Sianernermi utaqqineq maanna akeqarunnaassaaq
- Nakorsap oqarasuaataanut sianernermi akeqanngitsumik utaqqinerup atuutilersinneqarnissaa naalakkersuisoqatigiilernissamut isumaqatigiissummi oqaatigineqarpoq, anguniakkap taassuma imaaliinnartoq anguneqarsinnaalernera Naalakkersuisut nuannaarutigisorujussuuaat. Suliassaq taanna pillugu TELE-POST Peqqinnissaqarfillu suleqatigiilluarsimapput, tamannalu ikorfartueqataavoq, pilertortumik pitsaasumik iluarsiissuteqartoqarneranut, Peqqissutsimut Attaveqarnermullu Naalakkersuisoq Steen Lynge oqarpoq nangillunilu:
- Peqqinnissaqarfiup innuttaasoq qitiutillugu sullissinissaa Naalakkersuisut pingaartippaat. Utaqqinerup akeqannginnerata atuutilersinneratigut, innuttaasut peqqinnissaqarfimmut saaffiginninnissamut assigiinnerusumik periarfissaqarnissaannut tunngatillugu qularnaarneqarnissaanut tunngatillugu ataatsimik alloriarpugut, Steen Lynge oqarpoq.
Suliniummut matumunnga tunngatillugu akeqanngitsumik sianernermut atorneqartussanik peqqinnissaqarfik oqarasuaatinut nutaanik normutaassaaq. Normut tamarmik 80-imik aallaqqaatillit aaqqissuussineq atuutilersinnagu innuttaasunut nalunaarutigineqassapput.
Suliniummut nutaamut aningaasartuutit TELE-POST-imit Peqqinnissaqarfimmillu akilerneqassapput.
