SIAD akerliussutsimik takutitsivoq

Danmarkimi Islamisiornerup Siaruaannissaanut Akerliusut peqatigiiffiat, SIAD, kalaallit Gellerup Parkenimi musliminit ajortumik pineqartarnerat pillugu akerliussutsimik ullumi takutitsipput. Ilanngutassiortorput Rosa Thorsen Århusimi Rådhuspladsimi najuuppoq.
aggustip 24-at 2008 10:55

Rosa Thorsen Danmarkimi ullup qeqqarluinnartoq Århusimi Rådhuspladsimiippoq, SIAD-ikkormiut akerliussutsimik takutitsisut malinnaavigai. Erfalasorput arlalitsigut saqqummiunneqartoq takuneqarsinnaasimavoq. Danskit islamimut akerliuniartut 30 t tikillugit missaanniittut takkussimanerarpai, inuusuttuaqqallu autonominik taasartagaat, ammip qalipaataanik immikkoortitsisunut akerliuniartut 50-it missaat akianiillutik. Taakku imminnut suaartaappalupput, takuneqarsinnaavorlu tusagassiuutit arlalissuit aamma takkussimasut. Aamma politiit 20-t tikillugit amerlassusillit najuupput Kalaaleq takkuttutuaq, Aasiammiu, Gerth Brask, Rosa Thorsenip oqaluussimavaa. Taanna oqaluttuarpoq, muslimit kalaallinut pissusilersuutaat ukiuni kingullerni ingatsikkaluttuinnartoq. Kalaallit Århusimi siulittaasuata tullia, Theresa Brønden-Jensen aamma oqaloqatigisimavaa, taassumalu oqaluttuaraa Gellerup Parkenimi kalaallinut pissusilersuutit ukiuni kingullerni ingatseqisut, kalaallinillu immikkoortitsinerit ulloq manna tikillugu suli piuaannartut, allaat kalaallit Gudrunsvejimi najugallit aninissaminnut ernumasartut unnerlugit.