Shiamuslimit Kerbalamut ingerlaaqatigiittorsuupput
Shiamuslimit 200-t missaat upperisartik naapertorlugu illoqarfimmut iluartuutitaminnut Kerbala-mut ingerlaartut peqqarniisaarniarluni qaartartumeerinertigut ulluni kingullerni toqunneqarput.
Taamaakkaluartoq shiamuslimit millionit sinneqartut illoqarfimmut iluartuutitaminnut Bagdadip kujataata kitaaniittumut ingerlaartuarsinnarput.
Tassa taamaaliorput Saddam Husseinip kisermaassilluni naalakkersuinerata nalaani taamatut ingerlaaqatigeeqqusaannginnamik – taamatut ukiumoortumik ingerlaartarput pruffiitip Muuamaap ernutaa, muslimit palasiat Hussein eqqaaniarlugu.
Muslimit palasiat Hussein ataqqiniarlugu takkussuupput bussinik siuleriiaarlutik, biilit siuleriiaat pisuinnartorpassuillu allagartalisaartut. Ornitaat tassaavoq muslimit palasiata ilerra. Inuit millionit sinneqartut illoqarfimmut apuutereerput sulilu allat illoqarfiup tungaanut ingerlaarlutik. Unitsinneqarsinnaanngitsutut ipput. Peqqarniisaarniat saassussinerinit, aqqusernup sinaani qaartitsinernit aamma imminuutigaluni qaartitsinernit ukiormanna 200-t sinneqartut toqutaareerput.
Bagdadimit Kerbala-mut ingerlaaqataasut ilaata 32-nik ukiullip ingerlaaqataanermini arlaannik pisoqaratarsinnaammat ilaquttami qaninnerusami aqqi allattoriarlugit ujamiliussimavai.
- Kerbala-mut ingerlaarninni toqutaassagaluaruma kinaassusersineqarsinnaaniassagama taamaaliorpunga, oqarpoq.
Aamma erseqqissarpaa sunnimuslimit ingasattajaarniat ersiginnginnamigit, tassami shiamuslimit upperisaminni tunngavigisaat aamma Islam illersorusukkamigit.
Irakimiut sakkutuui 10.000-it ingerlaaqatigiit isumannaatsuunissaannik isumaginnittussat nakkutilliitinneqarput. Muslimit illoqarfimmi oqaluffii pingaarnerit nakkutigeqqissaarneqarput. Kerbalamut millionip affaanik innuttaqartumut, inuit millionit aappaata affaanik amerlassusillit takkunnissaat naatsorsuutigineqarpoq.
Kisermaassilluni naalakkersuisup Saddam Husseinip nalaani Kerbalamut ingerlaaqatigiinneq inerteqqutaavoq. Taanna 2003-mili uppititaammat Kerbala-mut ingerlaaqatigiittartut amerliartuinnavissimapput, tassa kitaamiut naatsorsuisarnerat naapertorlugu ukioq 680-imi muslimit palasiata Husseinip toqunera eqqaaniarlugu ingerlaaqatigiittoqartarpoq ukiormannalu ingerlaaqatigiit aatsaat taama amerlatiginissaat naatsorsuutigineqarluni.
