Shellip Alaskap issittortaani misileraalluni qillerinissani taamaatiinnarpai
Akuersissuteqartoqarnerani avatangiisinut tunngatillugu paasissutissat isiginiarneqarsimanngilluinnarput. Eqqartuussiviullu aalajangernera Shellip tungaanit pakatsissutigineqarsimaqaaq, Alaskamilu siunissami uuliasiorluni qillerinissaminut periarfissaarunneqararpoq. Taamatulli aalajangertoqarnera Greenpeacemit nuannaarutigineqaqaaq Greenpeace Danmarkimilu issittoq pillugu akisussaasoq aamma nuannaartupilussuuvoq.
- Alaskami Issittullu sinnerani uuliasiorluni qillernerit navianaateqarluinnarnerinik pinngortitamullu sunnertiasumut ajorluinnartumik kinguneqarsinnaanerinut mianersoqqusinerit tusaanngitsuusaaginnarsimavai. Ingerlatsiviup uuliasiorluni qilleriviutaa siorna malissuarnit uppisinneqallarmat mianersuaatsumik suliniutaa ajutoorpoq, taamaammat Shellip matumani aalajanginera naleqquttuuvoq, Jon Burgwald, Greenpeace Danmarkimi Issittumut akisussaasuusoq oqarpoq.
Greenpeacep illersuiniarluni suliniutaa Save The Arctic, nunarsuaq tamakkerlugu januaarip qaammataani inunnit 5 millioninit tapersersoqarpoq. Suliniutip siunertaraa Issittumi uuliasiorluni qillerinerit inerteqqutaalernissaat, Issittup imartaani aalisapilukkunnaarsitsinissaq kiisalu Qalasersuup, ullumikkut nunat arlaannaanilluunniit pigineqanngitsip, eriagisassatut nunarsuarmioqatigiinnit reservatinngortinneqarnissaa.