Shell Ruslandimi issittup imartaani uuliasiulissaaq
Ruslandip ministeriunerata Putinip uuliasioqatigiiffissuaq Shell tatiginninnermik nalunaarfigigaa, canadamiut aviisiat, Globe and Mail allaaserinnippoq.
Uuliasioqatigiiffissuup BP-ip aamma russit isumaqatigiinniarnerat ajalusoortorlu maanna uuliasioqatigiiffik Shell imartami Karami uuliasiornissaminut akuerineqarnissaa qularnarunnaarpoq, tamannalu pissaaq russit uuliasioqatigiiffissuat Rosneft peqatigalugu.
Rosneftip qullersaasa aammalu Shell-ip qullersaasa ataatsimiinneranni, Putin oqarpoq Shellip russillu suleqatigiinnerat qangali ajunngitsumik ingerlasimasoq taamaattumillu maanna suleqatigiinnermik isumaqatigiinneq pitsaasuussasoq qularutiginagu.
Ataatsimeeqatigiinnerup nalaani Putinip aamma oqariartuutigaa BP-mik suleqateqarsinnaaneq russinit suli mattunneqanngimmat.
Imartami Karami, Sibiriap avannaani qillerivissat nunarsuatsinni uuliaqarnerpaatut ilimagineqartarput, naatsorsuutigineqarluni tamaani uulia nappartat 35 milliardit qallorneqarsinnaassasut aammalu gassi 10 billioner kubikmeteri tamaaniittoq ilimagineqarluni.
BP taakkuupput Mexicop kangerliumanersuani siorna uuliasiortillutik maqisoortut. Shell tassaallutik Nunatta avataani uuliasiornissamut akuerisaasunut ilaasut.
