Shell isumalluarpoq
![](/sites/default/files/styles/image_934x467/public/article_images/boreplatform_nordsoen_630_5.jpg?itok=dpbnv0ZM)
Pete Slaiby, Shell-ip Alaskami uuliasiornermi pisortaanerata tullia aviisimut, Fairbanks Daily Newsimut oqarpoq, tamanna angisoorsuartut oqaatigisariaqartoq, pisuussuterpassuillu eqqaarsaatigalugit pingaarutilerujussuusoq. Taassuma ilanngullugu oqaatigaa imartani Chuckimi kiisalu Beaufortimi aasamut taallimariarluni qillerinissaq Shell-imit naatsorsuutigineqartoq.
Suliffeqarfiup qilleriniarluni inatsisitigut avatangiisitigullu misissuinerit anigorluarlugit maanna qillerinissanut qinnuteqaatit isumalluarfigai.
Aalajangivinnissaq USA-p nunami namminermi pissutsinut ministerianit, Ken Salazarimit oktoberip ingerlanerani tusarliunneqassaaq.
Pete Slaibyp Shell-imeersup oqaatigaa, Shell-ip akuersissutit pissarsiarissanerai suli qulakkeerneqarsimanngimmat kisiannili aalajangivinnissamut alloriarnerit tamarmik peqataffigineqareerput.
Qillerinissamut pilersaarutit oktoberip ingerlanerani Shell-mit inaarsarneqassapput aammalumi qillerinermi atortut Kinamiit, Norgemiit kiisalu New Zealandimiit Alaskamut nussorlugit aallartinneqareerput.
Akuersissut Shell-imit pissarsiarineqassappat, sumiiffimmi nappartanik 25 milliardinik amerlasuseqarnerangaasunik uuliamik qillerinerit aallartinneqassapput. Tunisassiornivik aallartippat ullormut nappartat 700.000-it qallorneqartarnissaat naatsorsuutigineqarpoq.