Sheila Watt-Cloutier nersornaatisilerpoq

Naggueqaterput Canadamiu avatangiisip illersorneqarnissaanik sorsuutiginnittoq Sheila Watt-Cloutier nunani tamalaani avatangiiseq pillugu nersornaatit nuimanersaasa ilaannik Sophie Prize-mik taaneqartartumik 600.000 koruunillu sinnerlugit aningaasartalimmik aqagu nersornaaserneqassaaq.

Sheila Watt-Cloutierip silaannarmik mingutsitsinerup akoorutissanillu aniatitsinerup kingunerisaannik inuit atugarliuutaannik nunat tamalaat paasinninnissaat oqallinnissaallu sulissutigiuarpaa.

Taamatuttaaq Inuit Issittormiut Kattuffianni ICC-mi siuttutut arlaleriaqaluni, silaannaap mingutsinneqarnera pillugu oqallinnermut inuit pisinnaatitaaffiinut tunngasut saqqummiuttarsimavai.

Minguup issittumut siaruaannerata silaannaallu kissakkiartornerata pinngortitamuinnaanngitsoq aammali inuit inuunerannut kulturiannullu kingunerluttarnera aamma paasisitsiniutigisarpaa.

- Issittumi atukkavut nunarsuatta sinnerani siunissami atugassarititaasunik takussutissiipput, silaannaallu allanngoriartornera nunarsuatta sinneranut siorasaarinertut paasineqartariaqarpoq. Issittormiulli tamanna atugarilereerpaat, kulturilu siku assigalugu nungukkiartulerluni. Sheila Watt-Cloutier oqarsimavoq.

Sheila Watt-Cloutierip nersornaat Oslo-mi aqagu tigussavaa.