Sheila Watt-Cloutier nersornaaserneqartussatut innersuunneqartoq

Nobel-ip eqqisseqatigiinnissamik suliniuteqarsimasumut nersornaasiuttagaannut ukiormanna tunniunneqartussamut innersuunneqartut katillugit 181-iupput, Inuillu atugaat pillugit sorsuutiginnittoq, Canadamiu Sheila Watt-Cloutier innersuunneqartunut ilaavoq.

Nobel-ip eqqisseqatigiinnissamik suliniuteqarsimasumut nersornaasiuttaagaa nersornaasiinerni akimanersaattut taaneqartarpoq.

Silaannaap kissatsikkiartuinnarnerata kingunerisaanik ajornartorsiuterpassuit aaqqiiviginiarneqarnissaat, avatangiisillu mingutsaaliorneqarnissaat Sheila Watt-Cloutier-p sorsuutiginnissutigiuarsimammagit nersornaaserneqartussatut innersuunneqarpoq.

Nersornaaserneqartussatut innersuunneqartut taaneqarsinnaasut allat tassaapput USA-mi præsidentimut tullersortaasimasoq Al Gore, Bolivia-p præsidentia Evo Morales, TV-kkut aallakaatitassiortartutut ilisimaneqarluartoq Oprah Winfrey, kiisalu Finland-ip præsidenterisimasaa Marti Ahtisaari.

Nersornaaserneqartussatut innersuunneqarneq imaannaanngitsuugaluarpoq, innersuunneqartulli utaqqimaaqqaalaartariaqassapput.

Ataatsimiititaliap tallimanik inuttallip tamanna aalajangiiffigeqqaartariaqassavaa, qaammatillu arlallit qaangiuppata aatsaat tamanna piumaarluni.