Sheila Watt-Cloutier nersornaaserneqaqqippoq

Canadami pinngortitaq pillugu nersornaasuittakkamik akimasuumik ICC-p præsidentia Sheila Watt-Cloutier, Avannaarsuani pinngortitamik illersuisarnini pillugu, nersornaaserneqaqqippoq.

Nersornaasiinissamut aalajangiisuusut oqaaseqaamminni allapput, ICC-p siulittaasuata qasusuilluni, inuit pilersitaannik silaannaap kiatsikkiartornera oqariartuutigiuarsimagaa, aammalu avannaarsuani inuit inooriaasiannut pisinnaatitaaffiinullu qanoq attuitiginera oqariartuutigiuarsimallugu.

- Arnap taassuma siuttutut sulinera pitsaalluinnarpoq annermik silaannaap kiatsikkaluttuinnarnerata mingutsitsinerullu kinguneri eqqartorneqartillugit suliniarluartarnera pissutaalluni.

Nersornaammik tunniussinissaq pissaaq, Sheila Watt-Cloutier Vancouver-imi Canadamiittumi avatangiisit pillugit juunip qaammataani sapaatip-akunneqalerpat oqalugiarnissaani.

Sheila Watt-Cloutier-ip ukiut marluk ingerlanerinnaani, nersornaaserneqarnerisa sisamassarissavaat.