Sheila Watt-Cloutier nersornaammik akimasumik tunineqarpoq
Nobelip nersornaasiuttagaanik ukioq manna tunineqartussat aqqi sapaatip-akunnerisa tulliit ingerlanerini saqqummiunneqarumaarput, nersornaasiuttakkamilli "The Right Livelihood Award"-imik tunineqartussat aqqi Sverigemi ullumi saqqummiunneqarput.
Nersornaat svenkit koruuniannik 3 millionit koruuninik, imaluunniit 2,4 millionit koruunit missaannik aningaasartaqarpoq, 1980-imilu tunniunneqartalerluni.
Nersornaat inuit ataqqineqarlutillu pinngortitamik pingaartitsillutillu pinngortitap eriagineqarnissaanik suliniuteqarsimasunut tunniunneqartarpoq, soorlu aamma inuit naligiimmik pineqarnissaannut immikkut suliniuteqarsimasumut tunniunneqartartoq.
Naggueqatigiillu Inuit sinnerlugit suliniuteqarluarsimasoq Sheila Watt-Cloutier Nobelip nersornaasiuttagaanut nersornaammik isaasalerlugu "taartissaanik" inuit pingasut allat peqatigalugit ullumi tunineqarpoq.
Issittup illersorneqarnissaanut suliniuteqarsimanini, tamaanilu innuttaasut kulturiminnik attassisinnaanissaaannut pillugu suliniuteqarsimanini nersorneqaatigalugu. Soorlu aamma silap pissusiat allangoriartornerata Issittumut sunniuteqaatai pillugit paasissutissanik tamanut siammarterisimanini nersorneqaatigigaa.
