Shazia Khan Ole Reimerilu.Assi: KNR

Shazia Olelu misissuiffittaami misissortipput: Sekundtinik marlunnik sivisussuseqarpoq ajornanilu

Coronavirusimik ersiuteqanngitsut misissortittarfissaat Nuup illoqarfiata qeqqani marlunngornermi ammarpoq. Nunanit allanit tikittut angerlarsimaannaqqusaareernermi misissorteqqittussat salliullugit misissortittarfittaami misissorneqartassapput.

Qanillinata KNR-imit ulloq misissuiffik siulleq malinnaaffigaarput.

- Tallimanngormat tikippugut, misissorteqqinnissamullu piffissamik ulloq taanna tunisilluta. Mittarfimmut anngukkatta misissorteqqinnissarput ilisimannginnatsigu iluatsitsisutut misigivugut, tassuugulu misissorteqqissaagut, Shazia Khan oqarpoq.

Shazia Khan Ole Reimerilu illoqarfiup qeqqaniittumi misissortittarfittaami misissortittussat siulliit ilagaat. Akissusitinissartik aneqqusaalernissartillu erinigigaluarlugu aarlerinngillat.

Misissuisarfik nutaaq
 

  • Misissuisarfik nutaaq Nuummi ammarpoq. Illoqarfiup qeqqani Kalaaliaraasimasumi inissisimavoq
  • Coronamik tunillatsissimanermik ersiuteqanngitsunut misissuivissatut atorneqassaaq
  • Nunanit allanit tikittut angerlarsimaannarnikullu misissorteqqittussat misissuiffimmi nutaami misissortittassapput
  • Misissuisarfik nutaaq Nakorsaaneqarfik Kommuneqarfik Sermersoorlu ataatsimoorlutik pilersitaraat
  • Nammineq kajumissutsiminnik sulisut misissuisuupput

- Naamik, tunillatsissimassarput ilimaginngeqqissaarpara. Aallannginnitsinni aamma misissortippugut, tunillatsissimassaguttalu ajuusaarnassaqaaq, ullunili kingullerni peqqiilliunngilagut. Angerlarsimaannarpugut pisuttuarsinnaallutali, Ole Reimer oqarpoq.

- Naamik, coronaviruseqarnermut ersiuteqannginnama ernumanngilanga, kisianni soorunami neriuppunga tunillatsissimananga. Kalaallit Nunaannut suliartorpugut, tikinnitsinniillu ulluni tallimani angerlarsimaannarluta.

Qaangiutipallattarpoq 

Kajumissutsimik sulisut misissuisuusassapput. Taakku sivikitsumik pikkorissartinneqarsimapput, misissortittussallu peqqissaasuniinnaq misissortittanngikkaluarlutik sulisut tatigilluarpaat:

Aap, Danmarkimimi aamma taamaappoq. Kalaallit Nunaannukanngilaattaa misissortikkatta ilinniartunit misissortippugut. Tamannalu ajunngilluinnarpoq, taamaammat toqqissisimaqqinnaarpunga, Shazia Khan oqarpoq.

Misissortereersut aniffissakkut aalajangersimasukkut anisarput, misissortinnerlu qaangiutipallattarpoq.

Miilu Lund Jensen aamma misissortikkiartorpoq:

- Misigisaq ajunngilaq. Isumannaallisaanermut malittarisassat naapertorpaat toqqissisimanaqaarlu, taanna oqarpoq.

Misissortereernermi utaqqineq kiserngoruttarpoq.

Misissortinnerup inernera SMS-ikkut nalunaaquttap akunneri 24-t iluanni nalunaarutiginiarneqartarpoq.

Misissortittarfittaaq januaarip ulluisa 31-ata tungaanut ammatinneqassasoq pilersaarutaagallarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat