Sharia tapersersoraat
Tapersersugaat tassaavoq oqartussat talibanit sharia atorlugu ingerlatsinissamik akuersissummik inatsisiliornerat.
Muslimit nilliaatigisartagaat nillerratigillattaajutigalugit allagartarsualisarlutillu angutit 15.000-t nuannaarnertik takutinniarlugu ingerlaaqatigiipput. Pakistanimimi oqartussat shariamik nunap immikkoortuani Swat-imi eqqussinissaq akuerivaat.
Amnesty Internationalip paasissutissaatai malillugit Talibanit eqqissiviilliortitsiuarnerat ukiuni kingullerni inuit 1.000-t inuartarineqarneranik kinguneqarsimavoq, allallu millionit affai najukkaminnit qimaasariaqarsimapput.
Inatsit sharia eqqunneqartussanngortoq tassaavoq niviarsiaqqat atuarsinnaanerannik inerteqqutaalersitsisussaq aamma arnat ilaquttaminnik ilaqartigatik angerlarsimaffimminniit anisinnaaneranik inerteqqutaalersitsineq.
Muslimit ingasattajaartumik upperisarsioqatigiit mullah Mohammed-imit siulersorneqartut piumaffigineqarsimapput sakkortusaarnernik unitsitsiniaqataassasut, mullah Mohammedillu imminnit ingasattajaarnerusumik upperisarsiortut talibanit ilaasa siuttuat, sakkuaakkunnaarneq anguneqassappat, nammineq ningaani, mullah Fazlullah isumaqatiginninniarfigisariaqarsimavaa.
- Maannarpunga eqqisseqatigiissitsiniarlunga, mullah Soofi Mohammed oqarpoq.
Mohammedip ningaava, mullah Maulana Fazlullah 3.000-inik sakkulersorlutik akiuuttartoqatigiinnut siuttuuvoq.
Swat-imilu aammik kuisinerit unikkunanngitsut, nunaqartut ilaat oqarput. Talibanit maaniittussaanngillat, inuiaqatiginngilagut, allameersut-uku, una eqqisseqatigiinneq iluaqutaanavianngilaq, sanaartugassanik tuniniaasartoq Shahbir Ahmed oqarpoq. Taanna uparuaanissamut sapiillisaartut ataasiakkaaginnannguusut ilagaat.
USA-p taamalu aamma Nunat killiit illersoqatigiiffiata NATO-p Talibaninik akiuiniarnerat Pakistanimi pisumit ajoqusiissangatinneqarpoq, Afghanistanimimi talibaninik akiuiniarneq, nunatut saniliani Pakistanimi akuerisamik talibaneqalernikkut ajornarnerulissaaq.
Talibanit qangatut aqutsiniarnerminni inunnik unioqqutitsinerakkaminnik toqutsisarnerat pillugu Pakistanip ilaani Swat-imi innuttaasut 1,2 millioniusut pingajorarterutaat nunaminnit qimarrannikuupput.