SF Sara Olsvig-mit taperserneqarpoq

Danmarkimi naalakkersuisunngortitsiniarnermi SF Inuit Ataqatigiinnit tapersersorneqassasoq isumaqatigiissugineqarpoq.

Ataatsimiinerit angusaqarluarfiusut Sara Olsvigip KNR-imut oqaatigaa.

- SF-imik suleqateqarnerup ingerlaannarnissaa isumaqatigiissutigaarput, Inuit Ataqatigiillu Folketingimi gruppia, tassa uanga, SF-illu Folketingimi gruppia naalakkersuisunngortitsiniarnermut atatillugu Socialdemokratinik isumaqatigiissusiornerani suleqatigiissasut aamma isumaqatigiissutigaarput, Sara Olsvig oqarpoq.

Taassuma erseqqissaassutigaa SF-ip Folketingimi gruppianut ilanngunnani, Inuit Ataqatigiilli Folketigimi immikkuussasut. Partii saamerliuniaq Enhedslisten aamma ataatsimeeqatigineqarpoq:

- Enhedslistenimik suleqateqarnerup aamma ingerlaannarnissaa isumaqatigiissutigaarput. Atlantikup avannaani pisut pillugit, Kalaallit Nunaanni Issittumilu pisut pillugit assersuutigalugu qaammatit marluk ingerlareeraangata naapeqatigiittarnissarput aamma takorloorparput, taakkununnga tunngassuteqartuni sutigut suleqatigiissinnaanerput oqaloqatigiissutigisinnaaniassagatsigu, Sara Olsvig oqarpoq.

Issittumut, Kalaallit Nunaannut, Atlantikullu avannaanut tunngassuteqartuni IA-p tusarnaarluarneqarlunilu oqaloqatigilluarneqartarnissaa, SF-ip Enhedslistenillu neriorsuutigaat, Inuit Ataqatigiillu Folketingimut 2001-imi ilaasortaatitaqaqqaaramili partiit illuatungiliuttut tapersersortarsimavaat, partiilli taakku tassa massakkut naalakkersuisunngortitsiniarlutik isumaqatigiinnialeruttorput:

- Partiit tapersersukkavut massakkut naalakkersuisunngulerput, inissisimanerpullu taamaattumik allanngortussaalluni. Partiillu naapinnerini malugisinnaavara assut suleqatiginnikkumasut. Taamaattumik siunissamut isumalluarpunga, Inuit Ataqatigiit sinnerlugit Folketingimut ilaasortanngoqqammersoq Sara Olsvig oqarpoq.