SF: Paatsoortoqarsimavoq
Partiit taakku pingasut siulittaasuisa nunanut allanut tunngassuteqartunut politikissaq pillugu siunnersuutaat aviisimi Politikenimi ippassaq saqqummiunneqarmat erserpoq, Danmarkip Irakimi sorsunnermut peqataanera, Afghanistanimi sorsunnermut aamma CIA-p nammineerluni tigusaminik timmisartuussisarneri pillugit ataatsimoorussamik paasiniaasussanik suleqatigiissitaliamut katersorneqartut.
- Tassani CIA-p sulerisarsimanera, matumani ilanngullugu Kalaallit Nunaata atorneqartarnera, paasiniassavarput, tamanna Villy Søvndalip KNR-imut ullumi erseqqissarpaa.
- Danmarkimi naalakkersuisunngortussat pisimasut pillugit suleqatigiissitaliarpassuarnik akisoqisunik pilersitsissanngillat, taamaattumillu sorsunnerit, tigusanik tunniussisarnerit aamma CIA-p tigusaminik timmisartuussisarnerinut tunngassuteqartut suleqatigiissitamut ataatsimoortillugit tamaasa katersussavavut. Apeqqutit tamakku Kalaallit Nunaannut pingaaruteqarluinnarnerat qularutiginngilluinnarpara, aammali tunngaviusumik Danmarkimut tunngatillugu taamaappoq. Kisiannili suli pingaaruteqarneruvoq pissutsit naalakkersuisuutitaqartut VKO-kkut nalaanni pisut siunissami uteqqqinnginnissaat, Villy Søvndal oqarpoq.
Paatsooqatigiinneq Politikenimi apersuinermi pivoq, tassa tusagassiortumit sooq arlaannaannulluunniit attuumassuteqanngitsumut misissuisitsinissaq eqqaaneqarsimannginnersoq apeqqutigineqarmat. Aammattaarmi CIA-p timmisartuussisarsimaneri pillugit suleqatigiissitami eqqarsaatigineqartumi ilaatinneqarnerat partiimi siuttuusunit pingasuusunit ersarissumik oqaatigineqanngilaq.
Ippassaq taamatut nalunaaruteqarneq kalaallinut Folketinge-mut qinigassanngortittunut arlaqartunut qisuariartitsivoq. Tassami Inatsisartunit Naalakkersuisunillu misissuisoqarnissaa piumasarineqarsimavoq. Taamaallaat Atassutip qinigassanngortitaata Steen Lynge-p tamanna kinguneqassangatinngilaa.