SF: Nunap inoqqaavi oqartussaassuseqarnerusariaqarput
- Isumaqarpunga nunap inoqqaavi namminneq issittumi siunissartik pillugu annerusumik oqartussaassuseqarnissaat, pingaaruteqarluinnartoq, Annika Smith oqarpoq.
Kalaallit namminneq inooriaasertik nalunnginnamikku, taamaattumillu nammineerlutik oqartussaassuseqarnissaat pingaaruteqartoq Annika Smithip oqaatigaa.
- Silap pissusaata allanngoriartorneranit annertuumik eqqugaaffik inuuffigaat. Taamaattumik nunap inoqqaavi Issittumi Siunnersuisoqatigiinni namminneerlutik atsioqataasinnaalerunik ajunngilluinnassagaluarpoq, Annika Smith oqarpoq.
Oqartoqarsinnaasoraajuk Danmarki Issittumi Siunnersuisoqatigiinut peqataasoq, Kalaallit Nunaat qanga nunasiaataasimanera pissutigalugu; Danmarkip, Kalaallit Nunaata oqartussaassusaanik "tillissimasoq"?
- Tillissimasutut immaqa oqartoqarsinnaanngikkaluarpoq, aappaatigulli soorlu oqarnittut qanga nunasiaataasimavoq. Taamaattumillu Danmark taamak ungasitsigisumi inissisimalluni; kilumiiterit tusindit arlalinni Kalaallit Nunaanniit inissisimalluni, sooq kalaallit namminneq oqartusaaffimmik tunineqannginnerat eqqumiiginalaarpoq, Annika Smith oqarpoq.
