SF: Lindøværfti maskiinaliorfinngorlunilu anorisaasiorfinngorli

Danmarkimi umiarsualiorfiup Lindø Værftip nukissiornermi maskiinaliorfittut anorisaasiorfittullu ingerlatsivingornissaa naalagaaffiup AP Møller-Mærskimut pitsaasumik neqeroorutigisariaqarpaa.
Allattoq Elisa Isaksen
aggustip 11-at 2009 17:02

Taama isumaqarpoq SF-ip gruppeani siulittaasoq Ole Sohn, Lindø værftip 2012-imi matuneqarnissaa ippassaq nalunaarutigineqareersorlu.

Suliassaqartitsinermut ministerip Inger Steubergip, sulisartut soraarsitaasussat suliffimmik allamik neqeroorfigineqarnissaannut ikiuunnissaq neriorsuutigaa. Taamaattorli aalajangiusimallugu Danmarkimi naalakkersuisut suliniutit aallartitaat suliffissaarusimalersussanut iluaqutaanerpaasussaasut.

- Isumaqarpunga Christiansborgimi ataatsimiiginnarluta suliffinnik pilersitsinavianngitsugut. Aammattaarli siunnersuutinut ammasuusariaqarpugut. Taamaattorli SF-ip siunnersuuteqarneratut ittut suliffinnik amerlanerusunik pilersitsinavianngillat. Suliffissaaruttut ataasiakkaat aallaavigisariaqarpavut, tamannalu umiarsualiorfik sulisartullu peqatigiiffii peqatigalugu piareersaleruttorparput, suliassaqartitsinermut ministeri Inger Steuborg Danmarkip Radiuanut oqarpoq.