SF-ip Socialdemokratillu isumaqatigiinnerat tassunga killeqarpoq
Taamatut SF nutaamik piumasaqalerpoq, Socialdemokratillu apeqummut iliuuseriniagaat isumaqatiginngilluinnarlugit, aviisimi Politikenimi ullumikut taama allaaserinnittoqarpoq.
Manna tikillugu partiit taakku marluusut, Irakimiut Danmarkimi qimaasutut akuerineqanngitsut angerlarartinneqarnissaannik naalakkersuisut isummernerat akuersaaraluarpaat. Maannali tamanna SF-ip akuersaarusukkunnaarpaa.
SF-ip taamatut isummernera Socialdemokratit isumaqatiginngilaat, aamma taakku nunasisunut oqaaseqartartuata Henrik Dam Kristensenip (S) Villy Søvndalip ilaasalu isummernerat malinnianngilaa.
- Angerlarartitsinerup unitsinnissaa pissutissaqarsorinngilara. Aammami sooq taamaaliussaagut? Tassami naalakkersuisut suliassat qallunaat inatsisaat najoqqutaralugit suliarineqarnissaat akisussaaffigaat, taamaaliornerallu tatigisariaqarparput. Taamaattumik angerlarartitsinerit ingerlaannartariaqarput, Henrik Dam Kristensen aviisimut Politikenimut oqarpoq.
SF aamma isumaqarpoq, nunasisunut ministeri Birthe Rønn Hornbech (V) pisinnaatitaaffini atorlugu Irakimiut ilaannik ikiorneqartariaqartunik akuersissummik tunniussisariaqartoq.
