SF Danmarkimi folketingimut qinerseqqusilerpoq

Ministerinik nikarartitsinerup kingorna SF-ip siulittaasuata, Villy Søvndalip statsministeri peqquaa maanna qinersisitsinissaanik. - Silaannaap salinneqarnissaa maanna pisariaqalerpoq, Søvndal oqarpoq.
marsip 08-at 2011 11:42

Danskit naalakkersuisuini ullumi allannguutinik pisoqarfiuvoq. Arnat pisinnaatitaaffiisa ulloqartinneqarnerat eqqorlugu ministerit arnat marluk tunuarput, angutinillu marlunnik taarserneqarlutik.

Nunasisunut aamma ilagiinnut ministeri Birthe Rønn Hornbech tunuarpoq naalakkersuinilu ilaasortaajunnaarluni. Palæstinamiunut inuusuttunut aammalu sumiluunniit innuttaassuseqanngitsunut eqqunngitsumik sullissinera pissutaalluni soraarsitaasutut Birthe Rønn Hornbech oqaatigineqarpoq.

Ministerilu arnaq alla, Ilinniartitaanermut ministeri, Tina Nedergaard tupaallaataasumik aamma tunuarpoq. Ilaqutariinnerminni pissutsit taassuma tunuarnerminut patsisigivai.

Ministerit arnat marluk tunuarnerisa kingorna, statsminister Lars Løkke Rasmussen erngerluni ministerinik allanngortiterisariaqalerpoq.

Nunasisunut ministerinngortippaa, Søren Pind, taassuma maannamut ministeriuffini, tassalu nunanut siuarsagassanut tunngasut, tigummiinnassavaa, taamaalilluni marloqiusanik ministeriuffeqalerluni.

Kulturministeri, Per Stig Møller aamma marlunnik akisussaaffeqalerpoq, tassa ilageeqarnermut ministereqarfik aamma taassuma ministeriuffigilermagu.

Ilinniartitaanermut ministerinngorpoq Troels Lund Poulsen, taassuma ministeriuffigisimasaa tassalu Akileraartarnermut ministereqarfik, Venstret politikkikkut oqaaseqartartuanit, Peter Christensenimit ministeriuffigineqalerluni.

Ministerinik allanngortiterineq danskit Naalakkersusiuinut qanoq sunniuteqassanersoq, DR-ip politikimut tunngasunik malinnaatitaata, Claus K. Nielsenip ima oqaaseqarfigaa:

- Naalakkersuisunut tamanna ajorseriaataavoq. Lars Løkke Rasmussenip tupaallaatiginerugunarpaa, Ilinniartitaanermut ministerip Tina Nedergaardip tunuarniuteqarnera. Qinersinissaq taama qanitsigilersorlu ministerinik allannguisariaqarnera soorunami qinersinermi ajoqutaasinnaavoq, tassami taamasiorneq qinersinissami iluaqutaasussatut oqaatigineqarsinnaanngimmat, Claus K. Nielsen naliliivoq.

Ministerinik nikarartitsinerup kingorna SF-ip siulittaasuata, Villy Søvndalip statsministeri peqquaa maanna qinersisitsinissaanik.

- Silaannaap salinneqarnissaa maanna pisariaqalerpoq, Søvndal oqarpoq nangillunilu:

- Pissaanermik tigumminninniaannarneq kimulluunniit tulluanngilaq. Maanna pisut aallaavigalugit Lars Løkke Rasmussenip qinersisartut aperisariaqalerpai Danmarki kikkunnit aqunneqassanersoq, kammalaatiminik ministerinngortitsineq piunnaarlugu. Tassami qaammatialunnguit qaangiuppata qinersisoqartussaavoq, Villy Søvndal kaammattuivoq.