SF: Danmarki ikiuuttariaqarpoq

Kalaallit meerartaasa atugaat pitsanngorsarniarlugit Danmarki ikiuuttariaqarpoq.

Taama oqarpoq SF-ip isumaginninnermut oqaaseqartartua Pernille Vigsø Bagge, tassa MIPI-p nalunaarusiaani kalaallit merartaasa amerlasuut piitsuullutik inuunerat saqqummiunneqareersorlu.

- Meeqqanut taakkununnga danskit tungaanniit angisuumik pisussaaffeqarpugut. Inuttut atugarissaannginnerup Kalaallit Nunaanni Danmarkimilu kingornuttakkatut atugaanera akiortariaqarparput. Atugarissaannginnermut aamma uagut akisussaaqataavugut, Pernille Vigsø Bagge nutaarsiassaqartitsivimmut Ritzauimut oqarpoq nangillunilu:

- Pineqartoq pillugu ilisimasatsinnik tapersersuisariaqarpugut. Matumani Namminersornerullutik Oqartussat qulaaniit naalakkersorneqarnissaat pineqanngilaq, ikiuinissarli pineqarpoq.

Elsebeth Gerner Nielsenip Radikaleneersup SF-it isumaqatiginngilai. Taanna isumaqarpoq Namminersornerullutik Oqartussat isumaginninnerup tungaatigut namminneerlutik ingerlatserusunnerat Danmarkip ataqqisariaqaraa. Taarsiullugu Nunat Avannarliit Siunnersuisoqatigiivisa Nunatsinni meeqqat piitsuussusiat oqaluuserissagaat siunnersuutigaa, nutaasiassaqartitsivik Ritzau taama paasissutissiivoq.