Sethsen iperagaassanngilaq

Københavns Byret aalajangiinera Østre Landsrettimi ullumi naqissuserneqarpoq, taamaasillunilu inuunermi sinnerani parnaarussassanngortitaasimasoq Seth Sethsen Nunatsineersoq misiliutit iperagaanani parnaarussivimmiiginnassaaq. Eqqartuussissuserisua Stine Gry Johannesen Ritzaumut taa paasissutissiivoq.
septembarip 30-at 2013 11:25

Seth Sethsen, 60-inik ukioqangajalersoq, oktobarip 22-iani ukiuni 28-ni parnaarussaaqqasimassaaq, taamaalillunilu Danmarkimi parnaarussivinni sivisunerpaamik parnaarussaaqqasimalissalluni.

Albertslundimi taxartitsisumik marloriarlugu aallaallugu toqutsisimasutut inuunermi sinnerani parnaarussassanngortinneqarluni 1986-imi eqqartuunneqarpoq.

Toqutsineq ajutoornikkut pisimasoq nassuiaasimavoq. Taxap ujajaaffiginiarnerani uivertoqarnerani marloriarluni aallaasoorsimanerarpoq.

Iperagaanissani arlaleriarluni noqqaassutigisimagaluarpaa, akuerineqarsimanngisaannarlunili.

Kissaateqarnera kingulleq Pinerlussimasunik Isumaginnittoqarfimmit itigartinneqarpoq, kingorna Glostrup Eqaartuussivianit aamma itigartinneqarluni, maannalu Østre Landsrettip naqissuseqqippaa iperagaanissaanut suli piffissaanngitsoq.

Inuunermi sinnerani parnaarussassanngortitat nalinginnaasumik ukiut 14-it imaluunniit ukiut 17-18-it qaangiunnerini misiliutitut iperagaasaraluarput, eqqartuussissuserisoq paasissutissiivoq.

Malittarisaniillu allaasumik pisoqartarpoq. Politiinik sisamanik toqutsisimasoq Palle Sørensen iperagaanissi tikillugu ukiuni 33-ngajanni parnaarussaaqqavoq.

Seth Sethsenip eqqartuussissuserisuatalu suliaq Folketingip Ombudsmandianut suliassanngortinniarpaat.

Ombudsmandip Pinerluuteqarsimasunik Isumaginnittoqarfimmut noqqaassuteqaqquniarpaat Setthsen parnaarussat allat pineqartarnerattuulli peqqullugu, taamaaliornikkut isumaginnittoqarfik iperagaanissamut suliamik aallartisaaqqullugu.