Sermit iigartartut aakkiartupiloorput

Sermit iigartartut anginerit pingasut iluliarsuarnik pilersitsinerat ukiuni kingullerni annertusisimaqisut, ilisimatuutut aviisimut Berlingske Tidendemut oqaatigaat.

Ilulissat kangiani sermeq iigartartoq ilulissanik 30 kubikkilometerisut angitigisunik aniatitsisoq qaammataasat atorlugit misissuinerit aammalu sermit ornillugit misissuinerit takutippaat. Sermeq, ukiuni kingullerni qulini pingajoraarterutaannaanik aniatitsisaraluarpoq, tassalu ukiumut 10 kubikkilometerinik, 1992-imilu 5 kubikkilometeri aniatinneqarluni.

Taamaasilluni ukiuni kingullerni 17-ini sermeq uukkartartoq arfinileriaatinngorsimavoq. Tamannalu isumaqarsinnaavoq, nunarsuup imartai, FN-imit siulittutigineqartumiit qaffannerussasut, ilisimatooq DTU-meersoq Shfaqat Abbas Khan isumaqarpoq.

- Kujataata Kangiani Kitaani maannalu aamma Kitaata Avannaani sermit iigartartut aakkiartornersuat takoriigarput, Kalaallit Nunaata sinneranut siaruaatissappat, taava Nunarsuup imartaani tamani imaq ukioq 2100-nngortinnagu 1-1,5 meterit akornanni qaffassasoq ilisimatuut misissuisut isumaqarput.