Sermip supinerata kingorna takornariat marluk ajunaarput

Qallunaat takornariat marluk ippassaq Uummannap nunaqarfiisa ilaanni Ukkussissat eqqaanni Kangerluarsummi sermersuup ernganik suppussaallutik ajunaarput.
Allattoq Jaaku Lyberth
juulip 14-at 2008 16:49

Takornarianut angallassissut KISAQ takornarianik, sermip ungasinngisaata eqqaaniitillugu, takornariat aqqaneq marluk angallammiit niupput, sermillu eqqaanut assiliiartortillutik takornariat tallimat sermersuup ernganik suppugunneqarput, pingasullu Kitsami inuttanit annaanneqarput.

Ajunarneq pillugu Radioaviisimiit KISAQ-p naalagaa Anders Pedersen paasiniaaffigaarput, taama alianartigisumik pisoqarnera qanoq oqaluttuarisinnaaneraa:

-Ukiut 20-t angallassisarnitsinni sermip eqqaanut angalajuartarsimanitsinni taamatut ippassaq alianartumik pisoqarneratut misigisaqarfigisimanngisaannarpugut. Sermip eqqaa ornittuartarsimavarput, aammami nuannareqigatsigu, ippassarlu taamatut pisoqarnera assorsuaq tupassutigaarput, KISAQ-p naalagaa Anders Pedersen tupassimaqisoq oqaluttuarpoq.

Aperaarput, taama alianartigisumik pisoqarnera sumik pissuteqarsinnaanersoq, ima akivoq.

- Naatsumik oqaluttuarissagukku pisoq imaappoq, Sermip ungasinngisaata eqqaani angallammi uninngavugut, tassaniinnitsinnilu sermersuup erngata supilernera tatsimeernersoq sermersuarmeernersorluunniit nalunarluni uagut ataaniit takusinnaanngisatsinni pisimavoq. Taamaallaat qanngulussuaq sermip tungaaniit tusaasinnaavarput, tassanngaannarlu sermip erngullu suna tamaat qaarlugu supivaat, imarlu tamarmi sermimik marrarmillu ulikkaarpoq, paatsiveerunnerlu aallartippoq, Anders Pedersen oqaluttuarpoq.

Aperaarput sillimaniarnikkut isumannaallisaanerat angallammi KISAQ-mi qanoq innersoq, tamanna ima nassuiarpaa:

- Siullermik oqaatigisinnaavara naak siornatigut angalasarnitsinni mianersortareeraluarluta, sermeq taama qanitsigalugu angallassisarnerput unitsipparput, soorunami taamatut pisoqarnerata kingorna aamma taamaattariaqarpoq.

Sillimaniarnikkut inissisimanerput imaappoq, soorlu gummibådet inuttallu piareersimajuaannarput, taamatullu aamma ilaasut qassiunersut eqqumaffigisarparput, ilaasullu angallammit qassit niusimanersut paasisimasarlutigu. Ippassaq pisoq eqqaassagukku aamma taamaaliorpugut. Tuaviornerpaamik inuttat gummibådimi piareersapallapput, takornariat qaarussaasut pingasut sapinngisannguartik tamaat annaatipallappaat, angallammullu pissullugit, ajoraluartumilli tassa marluk ipillutik ajunaarput, KISAQ-p naalagaa Anders Pedersen pisoq pillugu ajuusaaqisoq tupassimaqisorlu radioaviisimut oqaluttuarpoq.

Naggataatigut apeqqutigaarput, taamatut alianartumik pisoqarnerata kingorna sillimaniarnikkut isumannaallisaanertik sukateriffiginiarneraat, Anders Pedersen ima akissuteqarpoq:

- Aap, soorunami taamatut pisoqarnera eqqarsaatigalugu sukateriniarpugut, soorlumi sermimukartarnerput unitsipparput, KISAQ-p naalagaa tupassimaqisoq ajuusaaqisorlu Radioaviisimut oqarpoq.