Sermip iigartarfianut qaninnerpaaffissaq Norgemi nalilersuiffigeqqinneqalersoq

Norskit oqartussaasa sermit iigartartut saanni angallatinik angallassinermi killissarititaasoq, 200 meteri, nalilersuiffigeqqinnialerpaat arnaq takornariaq Svalbardimi sermip iigartarfiani 2012-mi ajunaareertorlu.
juulip 08-at 2014 08:21
Svalbardimiittoq 2012-imi iigarmat arnaq taanna ajunaartoq gummibådimi issimasoq, nrk.no taama allappoq.

Tamaani Nunatsinni umiarsuarmi aquttup kisimi nalilertussaavaa sermeq iigartartoq imaluunniit iluliarsuaq qanoq qallitigissanerlugu umiarsuarmi sillimaniarneq pitsaanerpaaq anguniarlugu.

Kisianni Diskolinemi, Qeqertarsuup Tunuani ilaasunik takornarianillu angallassisartumi, immikkut namminneq malittarisassaliorsimapput umiarsuaaraatitik sermit iigartartut iluliarsuilluunniit qanoq qanillisinnaatigissaneraat pillugu:

- Sapinngisarput tamaat angallatitsitsinni tamani, ilaasutsinnullumi, sillimaniarneq annertunerpaaq angorusukkatsigu. Taamaammat sermip iigartarfiatiguuleraangatta imaluunniit iluliarsuit sanioqqutileraangatsigit, taava aalajangersagaqarpugut minnerpaamik 300 meterinik ungasitsigalugit sanioqqutarnissaannut, Peter Sørensen, Diskolinemi teknikkimut pisortaq oqarpoq.

Svalbardimi ajunaarneq 2012-mi aggustip qaammataani pivoq. Taamani tassa arnaq takornariaq gummibådimut ilaatilluni sermip iigartartup eqqaaniitillutik sermeq iigarmat, sermit sakkortuumik gummibådimut nakkaammata ajunaarpoq. Tamannalu Nunatsinni aamma perartarsinnaasoq Peter Sørensenip ernummatigaa:

- Takusarpagummi takornariartaatit gummibådinik imaanut aqqartitseriarlutik, arfinilinnik arfineq-marlunnilluunniit ilaasoqarlutik, iluliarsuup ataatungaaniit imeq iluliarsuarmit aattoq imertarfigisaraat. Tamakku ernumalluta isiginnaartarpagut. Imminnummi allanullu taamaaliornermikkut navianartorsiortittarput, Peter Sørensen oqarpoq nangillunilu:

- Ilisimaneqarpormi imaani nillertumi annassagaanni 6 – 7 minutsit missaat kisimik periarfissaasut, aammalu napparsimaviit ungasissumiittut. Taamaammat ajorluinnartumik kinguneqarsinnaavoq malittarisassaqarmat piumagaanni malinneqarsinnaasunik imaluunniit malikkusunngikkaanni malinneqartariaqanngitsunik, Peter Sørensen oqarpoq.

Arctic Umiaq Line, maanna aqumiuni inuttarisaminik Issittumi umiartornermi ukiut 20-t sinnerlugit misilittagaqartunik inuttaqartumi, Søfartsstyrelsenip malittarisassai, tassalu umiarsuarmi aquttup iluliarsuarnut imaluunniit sermip iigarfianut qanoq qanitsiginissamut nammineq naliliisarnissaanut malittarisassaq atuutsinneqarpoq.