Sermip erngata qaarnera silap pissusaata allanngoriartorneranut pissutaanersoq misissuiffineqalerpoq

Takornariaqarnermik inuussutissarsiornermillu siunnersuisoqatigiinni pisortaq Thomas Rosenkrans ima oqarpoq:

Misissorusutarput unaavoq, tassa sermip erngata qaarnera silaannaap kissatsikkiartorneranik pissuteqarnersoq, taamalu siornatigumut naleqqiullugu ajunaarnerit amerlanerit siunissami ilimagisinnaanerigut, imaluunniit siornatigut ajunaarnerit taamaattut arlallit akuttunerusimanersut, taamaalilluta uppernarsaatissarsisinnaavarput ilumut silaannaap kissatsikkiartorneranik pissuteqarnersoq, imaluunniit nalaatsornerinnakkut taama alianartigisumik ajunaarneq pinersoq, Thomas Rosenkrans nassuiaavoq.

Aperaarput suliaq tamanna qaqugu aallartinniarneraat akivoq, tamanna manna piaartumik aallartissasoq, nangillunilu:

- Soorunami suliamik ingerlatsisussanik pissarseqqaassaagut, qanorlu suliaq ingerlanneqarniassanersoq, misissuinerlu aasaq manna sulinngiffeqareernerup kingorna aallartinneqassaaq, Thomas Rosenkrans radioaviisimut oqarpoq.

Aamma aperaarput, takornariat sermimut qaninngoorpallaartannginnissaannik siunnersorusunnginnerai, Thomas Rosenkranz ima akivoq:

-Tamanna aamma misissortariaqarparput, ilumut ataatsimut mianersoqqusissanerluta, imaluunniit sermip eqqaanukarniaraanni immikkut aaqqissuussamik nakkutiginnittoqassanersoq, tamannali misissuinerup qanoq inerneqarumaanersup takutikkumaarpaa, Thomas Rosenkranz misissuisitsinissaq pillugu Radioaviisimut taama nassuiaanermini.

Kalaallit Nunaanni takornariaqarnermik siunnersuisoqatigiit maanna Namminersornerullutik Oqartussat suleqatigalugit, imaatigut angallannermi isumannaallisaanikkut pilersaarusiorneq annertooq ingerlappaat.