Sermip aattup uumassusilinnut sunniutai misissorpaat

Silap pissusaanik paasiniaanermi sermersuarmiit imeq kuuttoq ilisimassallugu pingaaruteqarpoq. Imeq kuuttoq Nunattalu kangerluini pinngortitami uumassusillit ataqatigiinnerannut uumasoqarnermullu pingaaruteqarluinnarpoq. Ilisimasaqarnerulernissaq anguniarlugu, misissueriaatsit atortorissaarutillu nutaaliat ilisimatuut pitsanngorsarniartuarpaat. Utoqqarmiut Kangerluarsunnguanni erngup immallu imminnut sunneqatigiittarnerannik misissuineq, tassani erngup nukissiorfiit Nunatsinni annersaata tassaniinneranik pissuteqarpoq.
Allattoq Apollo Jeremiassen
juulip 13-at 2011 07:56

Sermersuarmiit imeq kuuttoq qanoq atsiginersoq paasiniarlugu, Silap pissusaanik ilisimatusarfik Nuummiittoq aamma Syddansk Universitet peqatigiillutik maanna atortorissaarutit nutaaliat atorlugit Utoqqarmiut Kangerluarsunnguanni, Nuup kujataaniittumi misileraleruttorput. Misissuineq PhD-nngorniarnerup ilagaa.

Misissuinermi inernerit innaallagissiorfiup aallartinnerminilli nammineq misissugaannut naleqqersuunneqassapput, taamaalilluni atortorissaarutit misissueriaatsillu naleqqunnersut paasinarsissammat.

Misissuinermi immami uuttortaatit nutaarluinnaat aamma atortorissaarutit qanganisat tutsuiginartullu ilaatigut atorneqarput.

Pilersaarutit malillugit misissuinerit ingerlapput, misissuinerillu sapaatip akunnialuini paasiniaaqqissaarneqareerpata inerneri tusarliunneqarsinnaalissasut, misissuisup Kunuk Lennert-ip, PhD-nngorniuteqarnerminut atatillugu oqaatigaa.

Misissuinerit pilersaarutit malillugit iluatsissimariarpata misissuinermi Nuup kangerlua aappaagu ilanngunneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq