Sermimut takornariartitsineq annertusivaat
Aviisimi Fyens Stifttidendemi tamanna atuarneqarsinnaavoq, Jens Ploug Hansen nulialu Bente Biilmann Larsen timmisartuutileqatigiinnik piginnittuupput, ulluinnarnilu Air Greenlandimi timmisartortartuullutik.
AirZafari takornarianik timmisartuussigaangami immikkut iliuuseqartalersimavoq.
TV-kkut isiginnaagassiat BBC-meersut aamma National Geographicimeersut ilaarlugit assit kusanarluinnartut nipilersuutitalersortalersimavaat - tassa sermersuaq qulangerlugu timmisoqartillugu takornariat tusartaatikkut nipilersukkanik tusarnaartinneqartalersimapput, misigisaallumi immikkuullarittarsimaqaaq.
- Sermersuaq qulaallugu timmineq misigisaavoq kusanarluinnartoq, Enyali imaluunniit Andrea Bocelli erinarsortut tusartaatikkut qaavatigut tusarnaajutigigaanni taava misigisaq suli attortinnarnerulertarpoq, Jens Ploug Larsen Fyens Stifttidendemut taama oqaluttuarpoq.
- Neqeroorupput atuisartutta nunarsuarmit tamaneersut ajunngilluinnartumik tiguaat. Angutimmi Australiamiup timmisartorami qullipissimanini uagutsinnut nassuerutigisimavaa, Jens Ploug Larsen oqarpoq.
Tassa timmisartumik tallimanik issimasoqarsinnaasumik ataatsimik, Kangerlussuarmiillu aallaaveqartussamik timmisartuutileqatiit aasaru amerleriassapput. Timmisartuutileqatigiit Ilulissani aasaq kingulleq ulappuseruttormata ullormut sisamariarlutik tallimariarlutilluunniit timmisartuussisarput.
