Kalaallit Nunaanni immiaaraliaq Greenland Brewhouse-mi Narsamiittumeersoq qaammammik ilivitsungajammik kinguartoorluni nioqqutaalerpoq.
Immiaaraq niuertarfinni pisiniarfissuarnilu tamani tallimanngorpat juunip ulluisa 29-anni pisiarineqarsinnaanngussaaq.
Immiaaraq Nuuk Imeq-mi puiaasaaqqanut immiunneqarpoq, sinerissamilu illoqarfinnut nassiussorneqaleruttorluni.
Immiaaraq Narsami immiorneqartoq nunarsuatsinni kisiartaalluni sermersuup ernga atorlugu immiugaavoq. Nunarsuatsinni erngit saligaannersaattut taasaq Greenland Brewhouse-mut pisussaaffiliivoq immiassat, taamaattumik hummelit qapuillu ullumikkut pisiarineqarsinnaasut pitsaanerpaat atorneqartut, nioqqutissiortut nalunaarput.
Siullermik immiaaraq qaamaneq – pale ale – tuniniarneqaqqaassaaq taaguuteqarluni Iced Flower. Immiaaqqallu nutaat allat qanittukkut nioqqutaalissaapput.
