Sermiligaaq nioqqutissaarutilerpoq
Tasiilap nunaqarfiisa ilaat 300-t missaani inoqartoq Sermiligaaq nioqqutissanik amigaateqarluinnarpoq. Sapaatip-akunneranut marloriarluni qulimiguulik Sermiligaamut pajuttarpoq, pisariaqarnerpaalli qajuusat sioraasallu ullut 14-t missaanni suli amigaatigineqartut Sermiligaami pisisartup Jafet Nathanielsenip oqaluttuaraa.
- Ullut 14-t sinnerpaat qajuusaqaratalu sioraasaqarata, Jafet Nathanielsen oqarpoq.
Sermiligaaq 300-t missaanni inoqarpoq, sulilu sikuummat angallammik Tasiilaliartoqarsinnaananilu nunaqarfinnut Kuummiunut isortumullu ingerlasoqarsinnaanngilaq, aammalu siku aserortilersimammat qimussertoqarsinnaanani. Qulimiguulik sapaatip-akunneranut marloriarluni Sermiligaaliartartoq kisimi isumalluutaavoq, inummulli ataatsimut bilitsi 1222 koruuneqarpoq.
- Taavami qanoq iliortarpisi?
- Allatut iliorsinnaanngilagut, ilaquttagut Tasiilamiittut Kuummiuniittulluunniit attavigisariaqartarpagut amigaatitsinnik nassissinnaannginneraatigut noqqaavigalugit. Maannali aamma Kuummiuni qajuusaqanngilaq. Kisianni tassa ilaquttagut aningaasaateqarsimanngippata nassinneqarsinnaaneq ajorpugut, Jafet Nathanielsen oqarpoq.
Tasiilami Pisiffimmi nunaqarfiit pilersorneqarnerannut akisussaasoq Anders Andreassen oqarpoq, qulimiguulik atorlugu assartuinermi inuit salliutinneqartartut, nioqqutissallu ulikkaarussaagaangata timmisartoqarfimmi uninngatinneqartariaqartartut.
- Sooruna nerisassat pisariaqarnerpaat ulluni 14-ini amigaatigiinnaraat?
- Nioqqutissanik amigaateqarnermik oqarneq killeqarpoq. Amigaatigineqartummi tassaanerupput; qajuusat sioraasallu. Taakku nungoqqajaalermatali niivertuat tamaanga piniartaqattaarpoq. Ajoraluartumilli helekopterip usisinnaanera killeqaqimmat annikitsukkuutaarlugit nassiunneqartarput, kisianni taakkua pissarsiarisartagaat ingerlaannaavik aamma nunguttarsimapput, inuit ataatsikkut pisiniartarsigamik ilaat taamaalilllutik nunguussaasarlutik, oqarpoq.
- Kisianni tassa aatsaat atugarliorsimagamik naammagittaalliorput?
- Naluara qanoq annertutigisumik atugarliortoqarnersoq sapinngisamik soorunami Sermiligaami niivertup isumaginiarsarivai, ingerlaavartumik taakku tikittarsimagaluarput oqarnittuulli annikitsukkuutaarlugit nassiunneqartarnerat kisimi taanna akornutaavoq, Tasiilami Pisiffiup nunaqarfinni nioqqutissanut akisussaasua Anders Andreassen taama oqarpoq. Taanna aamma oqarpoq ullumikkut immikkut attartorlutik qulimiguulimmik Sermiligaaliartitsissallutik.
