Siorarsiorfik: Sermersuup Sermitsiaq Tusagassiinermut tunngasuni aalajangiisartunut suliassanngortinnialersaaraa
Aviisip Sermitsiap Kommuneqarfik Sermersuup illoqarfimmik ineriartortitsinissamik suliniutaa Siorarsiorfik pillugu allaaserisamini arlalinni torersumik tusagassiorsimanersoq Tusagassiinermut tunngasuni aalajangiisartunit naliliiffigineqarnissaa kommunimit kissaatigineqarpoq.
Aviisip allaaserisaata suliniutip kommunimit aningaasalersugaanissaanik tunngaveqarnerat kommuni naapertorlugu eqqortuunngilaq. Suliniutimmi annerpaartaa namminersortunit sanaartugassaavoq.
Pingaartumik professorip Ole Helby Petersenip Roskilde Universitetimeersup suliniummut ikaartarfissuarnut Storebæltsbronut 30-40-nut assersuussinera Kommuneqarfik Sermersuumit isorineqarpoq. Professorip isornartorsiuinera kommunimut saqqummiunneqarsimanngilaq, tamannalu pissutigalugu Sermitsiaq Tusagassiinermut tunngasuni aalajangiisartunut suliassanngortinneqarpoq.
AAMMA ATUARUK Borgmesteri nakkutilliisunut unnerluutigineqartoq
Aaqqissuisuunerulli Poul Krarupip Sermitsiaq kukkussuteqannginnerarpaa.
- Kommunip aperinissaanut pissutissaqarsorinngilagut. Suliamummi tunngatillugu naliliivoq, taamaaliorsinnaatitaavorlu, Poul Krarup KNR-imut taama oqarpoq.
Kommunip Tusagassiinermut tunngasuni aalajangiisartunut suliassanngortitsisinnaanera ataqqinerarpaa, tamatumunngalu peqatigitillugu kommunip qanoq isumaqarnera soqutiginartillugu.
- Tusagassiornermut tunngatillugu, kommuni immikkut ilisimasallip naliliineranut qanoq oqaasissaqarnersoq tusassallugu soqutiginartissimassagaluarpara. Pisariaqarsorinngilarali, Poul Krarup taama oqarpoq.
