Sermersuup Nuummi mittarfittaassaq piginneqataaffigerusukkaa

Nunatsinni mittarfiliarineqartussat aningaasalersornissaat qulakkeerniarlugu akileraartarnermut inatsimmut allannguutissatut siunnersuut Naalakkersuisut saqqummiuppaat, mitttarfiit aningaasalersornissaasa ilaat tassuunatigut matussuserniarneqarluni.
Assi © : Kalaallit Airports/Youtube
Allattoq Jonas Fievé
novembarip 17-at 2017 08:14
Nutserisoq Mads Lynge

Naalakkersuisulli siunnersuutaat aqqutigalugu Kommuneqarfik Sermersooq akileraarutitigut isertitassaraluaminik 135 millionit koruuninik annaasaqassasoq, kommunip oqaatigaa, siunnersuutillu taamaatiinnarneqarnissa kajumissaarutigalugu.

Aviisi Sermitsiaq ullumi saqqummersoq taama allaaserisaqarpoq.

Kommuneqarfik Sermersuup taassuma saniatigut mittarfimmut pilersaarutinut piginneqataasunngornissaa kommunip kissaatigaa.

Kommuneqarfik Sermersooq isumaqarpoq siunnersuut ajoqutaasumik ineriartornerussasoq, Nuummimi mittarfissaq illoqarfiup qanittuani sanaartorneqartussaammat, attaveqaqatigiinnermut atortulersuutinik allanik assersuutigalugu umiarsualivinnik, nuna tamakkerlugu atuuttussamik suliffeqarfinnik, soorlu nuna tamakkerlugu napparsimmavik, universiteteqarfissanik assigisaanillu. Sermitsiaq taama allaaserisaqarpoq.

AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa

Mittarfiliornerup iluatsinnissaa pillugu Kommuneqarfik Sermersuup annertuutigut akuersaagassaqartariaqarnissaa qularnanngitsoq, borgmesterip oqaatigaa:

- Siunnersuutigissavarali ataatsimoorluta oqaloqatigiissutigissagipput aningaasalersuinermi qanoq tamatta pilliuteqarsinnaanerput, akileraartarnermi inatsisit taama sakkortutigisumik kingunissaallu misissoqqaarnagit imatut allanngortiternagit, Kommuneqarfik Sermersuup borgmesteria Asii Chemnitz Narup Sermitsiamut oqarpoq.

AAMMA ATUARUK Mittarfiit allamiunik sulisoqarluni sanaartorneqassasut