PERIUSISSIAQ Sermersuup Namminersorlutik Oqartussat utaqqikatakkaa

Kommuneqarfik Sermersooq Namminersorlutik Oqartussanut utaqqerusukkunnaarpoq, taamaammallu aningaasaliisartut namminersortut aturfinnut paaqqinnittarfinnullu nutaanut aningaasaliinissaat kommunip kissaatigigaa, borgmesteri oqarpoq.
februaarip 14-at 2017 12:01

Nuummi nutaanik atuarfiliornissamik suliaq Namminersorlutik Oqartussat ukiuni 15-ini kinguartittarmassuk, uagut aqqutit allat atorlugit atuarfiliornissaq isumagisariaqarparput.

Borgmester Asii Chemnitz Narup 1,5 milliardit koruuninut atuarfinnik paaqqinnittarfinnillu nutaanik sanaartortitsiniarnermut taama tunngavilersuuteqarpoq.

Aningaasaliisartut namminersortut atuarfinnut aningaasaliinissaat sanaartortitsinissaallu kommunip neriuutigaa. Taavalu attartorlugit akilersorlugillu.

Taamaaliornerli akisusinnaasoq, ilisimasallip oqaatigaa.

Aningaasatigulli akisussaassuseqartumik ingerlatsinissaq qulakkeerniarlugu Namminersorlutik Oqartussat qanimut suleqatigineqassasut borgmesterip oqaatigaa.

- Nutarterinissamut atugassanik Namminersorlutik Oqartussanut qinnuteqaatit ukiut 15-20-t matuma siornagulli Nuup Kommuneqarallarmalli nassiussorneqartaraluartut eqqaasitsissutigilaassavara. Kisianni itigartinneqartuarluta, Kommuneqarfik Sermersuumi borgmesteri, Asii Chemnitz Narup, Qanoruumut ataasinngormat oqarpoq.

Nuummi atuarfinnik sanaartornissaq akissaqartinniarlugu, OPP-mik taaneqartartumik suleqatigiinnissaq, tassalu anigaasaliisartut namminersortut sanaartornissaat aningaasaleeqataanissaallu, kommunip neriuutigaa.

Tamannali akisusinnaasoq, ilisimasallip oqaatigaa.

- Namminersortut suliniutinut aningaasaliissappata taava kommuni iluamik oqaatigalugu taarsigassarsisinneqassaaq. Tassalu taamaaliorneq tassaavoq pisortat aningaasanik taarsigassarsiornerat, Roskildep Universitetiani professori, Ole Helby Petersen oqarpoq.

Aningaasaqarnermulli naalakkersuisoqarfiup suliniutinut tunngaviusussatut  misissueqqissaarnernut najoqqutassai maleqqissaassagitik, Asii Chemnitz Narupip oqaatigaa.

Professori naapertorlu, kommuni akissaqartinngisaminik sanaartortitsinissaminut usserneqarsinnaavoq, taamaattoqassappallu akiligassat kinguaanut akilerneqartussanngussallutik.

Suliniutilli aningaasatigut akisussaassuseqartumik ingerlanneqarnissaat qulakkeerniarlugu kommuni Namminersorlutillu Oqartussat qanimut suleqatigiissasut Asii Chemnitz Narupip oqaatigaa.

- Isumaqarpunga erseqqissorujussuarmik oqaatigisariaqarlugu, kommunalbestyrelsemi eqqummaariffigeqqissaaratsigu soorunami qitornatsinnut ernuttatsinnullu aningaasatigut artugaannik nammakkiinaviannginnatta, Asii Chemnitz Narup oqarpoq.