Avatangiisinut ministereqarfiup ulluni makkunanerpiaq, nunatta sermersuata nakkutigineqarnerani qanoq periuseqassanerluni nalilersorpaa, tusagassiutinut nalunaaruteqartartut pisortaat, Mikkel Aarø-Hansen taama nalunaaruteqarpoq.
Nunatsinni sermersuup ukiuni tallimani kingullerni marloriaatinngorluni aakkiartornera pillugu atuagassiaq Science allaaserisaqareersorlu tusagassiutinut taama nalunaaruteqartoqarpoq.
Danskit sermersuarmik immikkut ilisimasallit nuimasut aarleqqutigaat, sermersuup aakkiartorneranik danskit nakkutiginninnerata isasoorsimanissaa.
- Assut aarlerinarpoq. Danmark Hollandisut Bangladeshitullu pukkitsigaaq, immamillu qarsunneqariaannaalluni, Niels Bohr Institutimi ilisimatooq Dorthe Dahl-Jensen oqarpoq.
Sermersuup sukkasuumik aattarfiini uuttuusersuutit arlaqarnerusut ikkussuunneqarnissaat pisariaqartoq aamma taassuma erseqqissarpaa.
Sermersuup aakkiartornerata naatsorsorneqarnerani paasineqarpoq, silaannaq 2,7 gradimik kiannerulissagaluarpat, imaq sukkasuumik aqunneqarsinnaanngitsumillu qaffakkiartulissasoq.