Sermersuup meeqqanut inuusuttunullu suliniutai Meeqqat Illersuisuata nuannaarutigigai
Tasiilami angajoqqaat akissarsinermut atatillugu meeqqamik paarineqarnissaannik periarfissaqarput, Nuifillu Nuummi ammasarnera sivitsorneqarluni, meeqqat inuusuttullu angerlarsimaffimmut ingerlalluartumut angerlarfissaqanngikkunik unnuisinnaanngorlugit. Nuummilu meeqqat innarfissaat qanilligaangat biilinik angerlaanneqarsinnaanngorlutik.
Suliniutillu tamakku Meeqqat Illersuisuannit nuannarineqarput:
- Tamatta nalunngilarput angajoqqaat akisussaaffigimmassuk meeqqamik peqqissumik toqqissisimanartumillu alliartornissaasa qulakkeerneqarnissaa, nalunngilarpulli angajoqqaaqarmat akisussaaffimmik tamatuminnga tigusisinnaanngitsunik, Meeqqat Illersuisuat Aviâja Egede Lynge oqarpoq, nangillunilu:
- Meeqqanik paarsineq sivisunerusumillu ammasalerneq ilaatigut kinguneqarsimavoq tuaviortumik inissiisarnerit apparnerinik meeqqanillu ulorianartorsiortunik suli ilimaginngisanik ikiuisinnaalernernik. Kommuneqarfik Sermersuup meeqqanut inuusuttunullu suliniutit pitsaalluinnartut pilersissimavai nersualaarusuppakkalu, Aviâja Egede Lynge oqarpoq.
Ilaqutariinnut ineriartornermut pikkorissarnermik akeqanngitsumik pilersitsisoqarnera Meeqqat Illersuisuata aamma nuannaarutigaa, Naalagaaffiit Peqatigiit Meeqqat pillugit Isumaqatigiissutaannik ilinniartitsiffiusumik.
