- Taamaattumik oqallinnerup aallartittup tigulluarnissaa pingaaruteqarpoq, taavalu aamma inuiaqatigiit sumut ingerlarusunnersut takullugu. Taamaammat innuttaasunik tusarniaanerit ingerlanneqarnissaat pingaaruteqarpoq, Kommuneqarfik Sermersuup borgmesteria Charlotte Ludvigsen oqarpoq.Assi: Kommuneqarfik Sermersooq

Sermersuup inui Hans Egedemut eqqaassutissap qanoq pineqarnissaanik ima aalajangeeqataasinnaasut

Hans Egedemut eqqaassutissap Nuummiittup qanoq pineqarnissaanik suliniummi siullermi Kommuneqarfik Sermersuumi inuit taasitinnerisigut peqataatinneqarngaalerput.

Kommuneqarfik Sermersuumi inuit Hans Egedemut eqqaassutissap Nuummiittup qanoq pineqarnissaanik aalajangeeqataassapput. Kommuneqarfik Sermersuup borgmesteria, Charlotte Ludvigsen, sapaatit akunneranni kingullermi taama ilimasaarivoq, maannalu taamaaliorsinnaanngorput.

Kommuneqarfik Sermersooq eqqaassutissap taassuma nuunneqarnissaanik nuunneqannginnissaanilluunniit ullumikkut sisamanngornermiit taasititsisinnaanngorpoq. Tamanna kommunip nittartagaasa ilaanni Kommuneqarfigami pivoq. Kommunimut allagaqarlutit aamma taasisinnaavutit. Taasititsineq kommunip inuinut tamanut atuuttoq sapaatit akunnerinik pingasunik sivisussuseqassaaq. Kommuneqarfik Sermersuup borgmesteria, Charlotte Ludvigsen, taama nassuiaavoq.

Eqqaassutissaq qalipaammik aappaluttumik "decolonize"-mik, tassa "nunasiaajunnaarneq"-mik allanneqarluni serlersaarneqareersorlu oqallisaaqaaq. Juunip ulluisa 21-ata, tassa inuiattut ullorsiornitta unnuaani serlersaarneqarpoq.    

AAMMA ATUARUK Borgmesteri: Innuttaasut Hans Egedep eqqaassutissaata siunissaa aalajangissavaat

- Oqallinneq aallartimmat sivisuumik ingerlasussaasoq aammalu initoorujussuusussaasoq takusinnaasimavarput. Uani takusinnaavarput oqallinneq nunasiaataasimanermut ingerlasoq, aammali oqaluttuarisaanitsinnut taavalu aamma upperisarsiornermut tunngatinneqarluni. Taamaattumik oqallinnerup aallartittup tigulluarnissaa pingaaruteqarpoq, taavalu aamma inuiaqatigiit sumut ingerlarusunnersut takullugu. Taamaammat innuttaasunik tusarniaanerit ingerlanneqarnissaat pingaaruteqarpoq, Charlotte Ludvigsen oqarpoq.  

Akuersisut amerlanerussuteqangaanngippata naammannavianngitsoq

Kommuni Hans Egedemut eqqaassutissamut akisussaasuuvoq. Taamaammat kommunalbestyrelsimi ilaasortat eqqaassutissap nuunneqassaneranik aalajangiisuussapput. Taasititsinermilu akuersisut amerlanerussuteqarluarpata eqqaassutissap nuunneqassanersoq isummerfigisassaraat. Nuunneqassappalli akuersisut amerlanerussuteqarluartariaqarput. 

AAMMA ATUARUK Oqallittut Hans Egedemut eqqaassutissap toqqavia aalaqqajutsikkaat

Eqqaassutissammi nuunneqarnissaanik taasititsinermi akuersisut akerliusullu naligiippata akuersisulluunniit amerlaneroqqarpata inissisimaffimminiiginnassagunarpoq. Akuersisummi aatsaat amerlanerussuteqarluassappata kommunalbestyrelsip tamanna aalajangissagaa, borgmesteri Charlotte Ludvigsen isumaqarpoq.

- Taasititsinermi akuersisut amerlanerussuteqangaarnissaat aalajangiinnginnermi pingaaruteqarpoq, borgmesteri oqarpoq, assersuutigalugulu amerlanerussuteqarlutik taasisut 75 procentigisariaqaraat.

Inuit siunnersuuteqarnissamut periarfissinneqarsinnaasut

Kommuni inuit siunnersuuteqarnissamut nittartakkamini Kommuneqarfigami periarfissiinissaminut aamma pilersaarpoq. Eqqaassutissap nuunnissaanik taasititsinermi siullermi akuersisut akerliusullu naligiippata tamanna pissaaq.

Inuit eqqaassutissap Nuup saavani qaqqajunnaap qaavaniittup sumut nuunneqarnissaanut sumillu tassunga inissiisoqarnissaanut siunnersuuteqarsinnaapput.

Taasititsineq siulleq qanorluunniit inerneqaraluarpat kommuni eqqaassutissap qanoq pineqarnissaa pillugu innuttaasunik ataatsimiisitsinissamik pilersaarpoq. Tamanna juulip ulluisa 21-anni pissaaq. Tamanna pillugu Kommuneqarfigami sukumiinerusumik paasissutisseeqqikkumaarlutik, Charlotte Ludvigsen nassuiaavoq.  

Borgmesteri tamatumunnga qanoq nammineq isummernerluni oqarumanngilaq.  

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat