Sermersuup ilisarnaatissaanik unammisitsineq aallartippoq
Kalaallit Nunaata sermersuanik atuiniarlutik nioqqutissiorniarlutillu aningaasaliiniarlutik piareersimasut amerlapput, taamaattumillu Namminersornerullutik Oqartussat maannakkut sermersuup Kalaallit Nunaannersuunerata uppernarsaatitassaanik ilisarnaammik sanatitsilerpoq.
Ilisarnaammik sananermik unammisitsineq kikkunnilluunniit peqataaffigineqarsinnaavoq.
Ajugaasoq 50.000,00 koruuninik akissarsiassaqarpoq, tullia 15.000,00 koruuninik akissarsiassaqarluni pingajuallu 10.000,00 koruuninik akissarsiassaqassalluni.
Sermersuup ilisarnaatissaanik unammisitsineq oktobarip ulluisa qulinganut killeqarpoq, unammisitsinerlu pillugu piumasaqaatit Namminersornerullutik Oqartussat nittartagaa nanoq.gl alakkarlugu atuarneqarsinnaapput.
Sermersuup pingaarnertut ilisarnaatai takutinneqartusaapput, tassalu sermersuup ilumoortuunera pisoqaassusia pinngortitamit pisuunera, Kalaallit Nunaanneersuunera piujuaannartitsinermillu tunngaveqarnera ilisarnaammi ilanngunneqassaaq.
Sermeq avammut nioqqutigineqartussaq Ilulissanit pisuussaaq sermersuarmit uukkareerluni imaanit kingorna qallorneqarsimasoq, Namminersornerullutik Oqartussat nittartagaanni taamatut allaqqavoq.
