Sermersuup ilaqutariit imminnut najuinnarnissaannut ikiorniarai
Ilaatigullu ilaqutariit angerlarsimaffiini tapersersorniarlugit perorsaasunik sisamanik allanik kommmuni atorfinitsitsivoq.
- Meeqqat inuusuttullu angerlarsimaffiup avataanut inissinneqarsimasut maannakkorpiaq 200-inik amerlassuseqarput. Angerlarsimaffimmi ikorfartorteqartitsisoqarneratigut meeqqat taakku anaanamut ataatamullu angerlarnissaannut periarfissaqalissapput. Tamanna aningaasaliiffigissallugu siunertaqarluarpoq, Meeqqanut Ilaqutariinnullu Ataatsimiititami siulittaasoq Uju Petersen tusagassiorfinnut nalunaarummi taama oqarpoq.
AAMMA ATUARUK Sermersooq inunnik isumaginninnermut 40 millioninik aningaasaleeqqittoq
Kommuni aappaagumut 800.000 koruuninik aamma meeqqat inuusuttullu ikiortariallit pillugit sulinermut atugassanik ukiunut pingasunut tullernut 1,2 millionit koruuninik aningaasaliivoq.
- Angajoqqaat amerlasuut qitornatik najoqqilerusullugit inuunerminni allannguiniarlutik ilungersuuteqarput. Imminulli suliarinissamut ilaqutariit suli pisariaqartitsipput, inooriaaserilersimasaminnillu ajornartorsiortitsisumit aniguinissamik pisariaqartitsillutik. Tassuunalu ikiorsinnaagatsigit assut nuannaarutigaara, Uju Petersen oqarpoq.