Sermersuup ernga USA-mi Japanimilu tuniniassamaarpaat

Namminersornerullutik Oqartussanut suliffeqarfissuarnullu imermik Sermersuarmeersumik illoqarfissuarnut, USA-mi Los Angelesimut, Japanimilu Tokyomut, tuniniaasalerusuttunut nutaarsiassaavoq tusaruminartoq.

Erngummi Sermersuarmeersup qanoq minguitsiginera pillugu ussassaarutissamik, Namminersornerullutik Oqartussat unammisitsissamaalerput, tuniniagaalerpat takussutissaasinnaasumik. Ilimagineqarporlu USA-mi Japanimilu atuisunut tamanna iluaqutaassagunarpoq.

Namminersornerullutik Oqartussani sulisoq, Dorthe Lund Kaack, aviisimit Berlingske Tidendemit apersorneqartilluni oqarpoq, erngup minguissusia nungusaataangitsumillu tuniniarneqarsinnaanera uppernarsarneqarsinnaappat, nunani allani tuniniarneqarsinnaanissaanut pingaarnerpaasoq:

-Pisisartuujumaartussat silap pissusaata allanngoriartorneranut atatillugu soqutiginnilluinnarnissaat ilimagineqarsinnaassaaq, Sermersuullu aakkiartunnginnissaa minguittuaannarnissaalu kissaatigissammassuk, Dorthe Lund Kaack oqarpoq.

Qeqertarsuarmi Uunartuarsuup puilasuanit imermik aappaagu tunisassiortoqarsinnaalissasoq Dorthe Lund Kaackip ilimagaa.

Immiaaqqiortut marluk vodkamillu imigassaliortartoq ataaseq Sermersuup sikua atorlugu immiortalereerput.