Taserujussuup 7100 kvadratkilometeritut annertutigisimanissaa, immikkut ilisimasallit Columbia Universitymeersut misissuinerminni allaaserisaminni ilaatigut oqaatigaat. Tassa Sjællanditut angitigisimassaaq. Tatsip itinerpaaffimmini 50 meterit aamma 250 meteritullu ititigisimanissaa eqqoriarneqarpoq. Toqqorsivimmit assi.

Sermersuup ataani taserujussuusimasoq nassaarineqartoq

Taserujussuusimasoq qangarsuaq susoqarsimanersoq sermersuullu nunarsuup kiatsikkiartornerani qanoq aakkiartortigissanersoq pillugu immikkut iliimasallit qaqutigoortumik ilisimasaqarfiginerulersinnaavaat.

Kalaallit Nunaata kimmut avannarpasissortaani Sermersuup ataani taserujussuusimasup sinnera nassaarineqarpoq.

Immikkut ilisimasallit tatsimik taamaattumik Kalaallit Nunaanniinnaanngitsoq nunarsuarmili aatsaavissuaq nassaarput. USA-mi ilisimatusarfiup Columbia Universityp immikkoortortaqarfia Earth Institute tusagassiuutinut taama nalunaartoq, nittartagaq Videnskab.dk allappoq.

Sermersuup ataani taserujussuup ukiunik 100.000-likkuutaanik pisoqaatiginissaa ilimagineqarpoq, allaallumi ukiunik 30 millioninik pisoqaatigisinnaanissaa immikkut ilisimasallit tatsip naqqanik misissuereernerminni oqaatigaat.

Tatsip naqqani nassaassaasut misissuiffigineqarneranni ujarannguunnikut immikkuullarissut, silap pissusianut tunngasut siornatigut nassaarineqarsimanngitsut uumassutsillu siornatigut takuneqarsimanngitsut nassaarineqarput.

AAMMA ATUARUK Nunarsuup imaa ukiut 80-it qaangiuppata centimeterinik qulinik qaffassinnaasoq

Taserujussuup Sermersuaqannginnerani pinngorsimanissaa ilimagineqarpoq.

Taserujussuup 7100 kvadratkilometeritut annertutigisimanissaa, immikkut ilisimasallit Columbia Universitymeersut misissuinerminni allaaserisaminni ilaatigut oqaatigaat. Tassa Sjællanditut angitigisimassaaq.

Tatsip itinerpaaffimmini 50 meterit 250 meterillu akornanni ititigisimanissaa eqqoriarneqarpoq.

Immikkut ilisimasallit Sermersuarmi qillerillutik Kalaallit Nunaat pillugu ilisimasaqarnerulernissaminnut periarfissaqassagunartut, Nicolaj Krog Larsen Københavnip universitetiani Institut for Geogenetikimeersoq oqarpoq.

Kinnerit tatsip naqqaniittut Kalaallit Nunaata qanga kingullermik sermersuaqarfiunnginneranik takutitsisinnaasut, silap pissusia qanoq allanngorarsimatiginersoq aamma uumasullu naasullu suut ukiut millionilikkaat matuma siornatigut nassaassaasimanersut takutissinnaavaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat