Sermersuup aningaasaqarnera sukannersumik nakkutigisaajunnaartoq
Aningaasaqarnermut Naalakkersuisoqarfiup kommunip aningaasatigut aaqqeeqqinnissamut pilersaarutaa naammagisimaangaaramiuk, sukannersumik nakkutiginninneq ingerlaannaq atuutilersumik atorunnaarsippaa.
- Nutaarsiassaq nuannerluinnarpoq, aningaasaqarnitta aaqqeqqinneqarnissaanik pimoorussilluta ilungersorlutalu sulisimanerput maanna kinguneqarluartutut takuneqarsinnaammat. Aningaasaqarnermut Naalakkersuisoqarfiup aalajangernerata takutippaa, aningaasatigut aqutsinerput tatigineqaqqilersimasoq”, borgmesteri Asii Chemnitz Narup oqarpoq.
AAMMA ATUARUK Kommuneqarfik Sermersooq sukannersumik nakkutigineqalersoq
Kommune qaammatit qulingiluat matuma siornagut sukannersumik nakkutigineqalermalli, kommunalbestyrelse sukannersumik aningaasatigut aqutsinissaq qitiutillugu sulivoq. Tamatuma ilaatigut kingunerisaanik aningaasatigut aaqqeeqqinnissamut pilersaarusiortoqarpoq, ingerlatsinermut aningaasaqarnikkullu aqutsinermut najoqqutassaliortoqarluni, missingersuusiornermullu malitassaliortoqarluni. Suliniutit tamakku tassaapput sukannersumik nakkutiginninnermik atorunnaarsitsinermini Naalakkersuisoqarfiup akuerisai.
Sukannersumik nakkutigineqarnerup taamaatinneqarnera ilutigalugu, kommunip Namminersorlutik Oqartussanut qaammatikkuutaartumik naatsorsuusiortarnissaanik piumasaq atorunnaarsinneqarportaaq. Sulianulli tunngatillugu tamanna Kommuneqarfik Sermersuumut sunniuteqassanngilaq.
- Qaammatikkuutaartumik naatsorsuusiortarneq aningaasaqarnermik aqutsinermillu ilorraap tungaanut sangutitsinissami sakkussatut pitsaalluinnartutut isumaqarfigaara. Taamaattumik taakku suliarisarnissaat nangeqqissavarput. Ukiumi nutaami nittartakkatsinnut saqqummiutissavagut, taamaalilluni kikkulluunniit paasisaqarfiginiassammassuk, borgmesteri Asii Chemnitz Narup oqarpoq.