Sermersuup aannerata sukkassusaa ilisimatuunit misissorneqalerpoq
Pilersaarusiaq, Fresh Linkimik atserneqartoq, tassaavoq, Nunat tamalaat issittumut ukiorititaata ilaa.
Professor Søren Rysgaard Ilisimatusarfimmeersoq ima nassuiaavoq:
- Ilisimaneqanngilaq sermersuaq ataaniit qulaaniillu qanoq aakkiartortiginersoq. Serminik ilisimatuut ilaatigut sermersuarmi sullipput, sermillu appariartornera qanoq annertutiginersoq uuttortarlugu. Suleqatigiit allat silaannarmi ilaatigut sullipput, sermersuullu qanoq portutiginera, ilulissallu qanoq annertutigisumik saaverarnersut, uuttortarlugit, Søren Rysgaard oqarpoq.
Søren Rysgaard erseqqissaavoq Fresh Linkip paasisai nunarsuarmi imaani uumassuseqarnermut pingaaruteqarumaartut.
-Imeq tarajuunngitsoq kuukkuni akulerullunilu, taava nunarsuarmi immap sarfaanut sunniuteqassaaq. Eqqumiitsorli unaavoq, sermeq aattoq imaani aalisakkat raajallu amerlassusiannut sunniuteqarsinnaammat, Søren Rysgaard oqarpoq.
Ilisimatuut assigiinngitsut paasisat sanilliussorniarlugit ukiaru katersuutissapput taamalu sermersuaq ataaniit qanoq aakkiartortiginersoq nalunaarusiussallugu.
