Sermersuup aakkiartornera ilisimaneqareerpoq

juulip 22-at 2005 14:35

Kangerlussuarmi sermersuup sisunerata sukkatsissimaneranik Greenpeacep kalerrisaarutaa, pimoorunneqartariaqartoq ICC sinnerlugu avatangiisit pillugit oqaaseqartartup Carl Christian Olsenip oqaatigaa.

Greenpeacep umiarsuaani Arctic Sunrise-mi ilisimatuut marluk marlunngormat avammut kalerriuteqarput, Tunumi Kangerlussuup sermersuaa ukiumut 14 kilometerinik annertussusulimmik sisusarsimasoq, taamatuttaaq 5 kilometerimik tiffasinnerulersimalluni, 14 kilometerinik annertuseriarsimanera sukkassimaqaaq, tassami 1988-mi sisunera 5 kilometeriinnaasimagaluarmat. ICC-p avatangiisit pillugit oqaaseqartartua Carl Christian Olsen oqarpoq tamanna pimoorulluinnarlugu paasisariaqartoq.

” Tamanna pimoorulluinnartariaqarpoq, tassami Greenpeace-kkuinnaanngitsut aamma tamanna pillugu misissuiuarput. ICC-p ukiuni qulini malinnaaffigereerpaa, Issittumi siunnersuisooqatigiit suleqatigalugit. Ukiullu qulit ingerlanerani ilimagisamit annerusumit sukkanerusimavoq, Carl Christian Olsen oqarpoq.

Carl Christian Olsen nangilluni oqarpoq, silaannaap kissassusia 6 gradimik nikissimasoq. Erseqqissarpaalu Issittumi siunnersuisooqatigiit ICC-lu peqatigiillutik kingunissai piareersarnialersaaritik.

“ Allanngorneq tamanna inunnut sunniuteqartussaavoq, nerisatigut imikkatigut sutigulluunniit. Taamaattumik sakkortuumik kikkunnilluunniit malinnaavigineqartariaqarpoq, Carl Christian Olsen oqarpoq.

Carl Christin Olsen erseqqissaavoq mingutitsineq inuit pilersitarisimappassuk, tamatuma annikillisarneqarnissaa ICC-miit pingaartikkitsik. Taamatuttaaq erseqqissaavoq novemberimi Københavnimi ilisimatuut ataatsimeersualerpata tamanna eqqartorneqartussaanerarpaa.