Sermersuumi politikerit aningaasatigut soqutigisaat saqqummiunneqartalissapput

Inatsisartuni ilaasortatulli Kommunalbestyrelsimi ilaasortat siunissami nalunaarsuivimmut ilanngussinnaalissapput, ilaasortat qanoq atorfeqarnersut, siulersuisuni sorlerni akissarsiaqaatigalugu ilaasortaanersut aamma suliffeqarfiit suut piginneqataaffigineraat innuttaasunit takuneqarsinnaalissalluni.

Aningaasatigut soqutigisat nalunaarsorneqartalernissaannut tamat oqartussaaqataanerisa tatiginarnerulersinnissaa pingaarnertut siunertarineqarpoq.

Borgmesterip Asii Chemnitz Narupip nalunaarsuisalernissaq isumassarsiaraa namminerlu aamma ilanngunniarpoq atulerpat.

- Innuttaasut unneqqariffigisariaqarpagut iliuutsitsinnik naliliisinnaaqqullugit, borgmesteri oqarpoq.

Inatsisartuni aalajangersakkat atorniarlugit kommunalbestyrelsimit aalajangiunneqarpoq. Inatsisitigut atorsinnaassusaat misissorneqareerpoq aamma tunngaviusumik pisinnaatitaaffinnut assortuutinngillat.

Kommunip nunaqarfiini aqutsisunut ilaasortat aamma periarfissinneqassapput nalunaarsuiffimmut ilannguteqqullugit. Siunnersuutip kommunalbestyrelsimi suliarinissaa sioqqullugu nunaqarfiit tusarniaavigineqassapput, taakku malittarisassanik aamma malinnittussaammata.

Siunnersuut aasaanerani sulinngiffeqarneq qaangiuteriarpat ataatsimiinnermi siullermi aggustip 18-iani pisussami suliarineqarlunilu aalajangiiffigineqassaaq.