Sermersuumi meeqqerivinni inissat atorneqanngitsorpassuit

Kommuneqarfik Sermersuumi meeqqerivinnut utaqqisut 200-uupput, taamaattoq meeqqerivinnut inissat 20 procentii atorneqanngillat. Tamanna Kommuneqarfik Sermersuumi meeqqerivinni inissat pillugit misissueqqissaarnermi paasineqarpoq.

Taamaattoq angajoqqaat arlaqartut namminersorlutik paaqqinnittartunut ilinniarsimanngitsunut, akileraarnerlu ajortunut, saattariaqartarput.

- Naalliunnaqaaq utaqqikatannaqaaq anaanaq meeqqerivimmut utaqqisuutilik Malene Olesen oqarpoq.

Taassuma, angajoqqaat utaqqisuutillit allat assigalugit, qaammammut pingasoriaammik akiliilluni meeqqani paaritittariaqartarpaa. Qaammammut akiliutip saniatigut nerisassat nangillu aamma aningaasartuutaasarput.

Namminersorluni meeqqerisoq napparsimappat paarlatsissaqarneq ajorpoq, tamatumunngalu angajoqqaat suliffeqarfiillu akiliisuusarlutik. Taamaammat Kommuneqarfik Sermersuumi meeqqerivinnut inissaatinik ulikkaartoq tusarlugu Malene Olesenip akueriuminaatsippaa.

- Assut tusarlugu nuanniippoq. Malene Olesen oqarpoq.

Taamattoqarnera politikerinit iliuuseqarfiginiarneqalerpoq, taamaammat utaqqineq sivikilliniarlugu sullissinerit sukaterneqarnissaat kommunimit siunniunneqarpoq.