Sermersuumi innuttaasut peqataatinniarlugit appiliortut
Borgmesterip allatseqarfia attaveqaqatigiinnermut immikkoortortaqarfik suleqatigalugu appimik - Isumaga-mik atilimmik - pileritsiniarluni suliaqaleruttorpoq.
Appi Isumaga innuttaasunik inuusunnerusunik taasititsinikkut piqataatitsissutigineqartarnissaa siunertaavoq.
Kommunip politikkerillu suliaat pillugit Isumaga atorlugu innuttaasut isumaat paasiniarneqartassapput, akulikitsumillu taasissutigineqarsinnaasunik kommuni ikkussisassalluni.
Kommunip misissuinerani inuusuttut ajornannginnerusumik peqataatinneqarnissaminnik kissaateqarnerat paasineqarsimavoq, taamaammat kommuni appiliorniarluni aalajangersimavoq.
Appi suliarineqarnera 100.000 koruuninik akeqartoq akilerneqareersorlu Kommuneqarfik Sermersooq KNR-imut ilisimatitsivoq.
Appi suli ineriartortinneqarmat qanoq isikkoqarnera susinnaaneralu erseqqinnerusumik oqaatigineqarsinnaanngilaq.
Isumaga innuttaasunik peqataatitsissutissaq apriilimi piareernissaa naatsorsuutigineqarpoq.