Sermersuumi eqqakkanik immikkoortiterinerusoqassaaq
- Meeraagallarama eqqaaginnartoqarneq ajorpoq. Suut tamaasa atorneqarsinnaapput allanullu atugassianngortinneqarsinnaallutik, taavali sivittunngitsoq suut atuinnariarlugit igiinnartarnerinik ileqqoq atugaalerpoq. Taamaattoqalernerata taama sukkatiginera tupaallannarpoq. Kingumut qivialaartariaqarpugut atuisutullu sianigisassatut avatangiisillu pillugit sianigisassatut ilinniarsimasavut eqqaamallugit.
Taama Asii Chemnitz Narup, IA-meersoq oqarpoq.
Isummanut aamma tunngassuteqarnerarpaa, taamaattumillu suliniarneq mikinernit aallartinneqassaaq.
- Aallartikannereerpugummi, aamma meeqqerivinni atuiarfinnilu aallartitserusuppugut. Eqqaaginnannginnissap sianiginiarneqarnissaa pingaaruteqarpoq. Pitsaanerujussuarmik iliorsinnaavugut.
Pilersaarutillu kusanartut Nuummiinnaq ingerlanneqassanngillat. Qeqqata Kommuniani ingerlallualereersimapput. Pingaartumik Sisimiuni eqqagassanik immikkoortiterineq iluatsitsiffiulluarpoq. Assersuutigalugu puiaasaaqqat, igalaamerngit qillertuusallu tamaasa immikkut containereqartinneqarput.
Kommunip borgmesteria Hermann Berthelsen, Siumut, naapertorlugu immikkoortiteriaatsimik pilersitsinissaq aamma sulissutigineqarpoq, innuttaasut nammineerlutik eqqagassanik ikuallanneqarsinnaasunik ikuallanneqarsinnaanngitsullu immikkoortiterisalersinniarneqarlutik. Borgmesterittaaq oqaatigaa Maniitsumi immikkoortiteriaatsimik assingusumik eqqussinissaq pilersaarutigineqartoq.
Immikkoortiteriaaseq avatangiisinut allaallumi immaqa aamma aningaasaqarnermut iluaqutissartaqaannanngilaq, aamma eqqaavilerisunit iluarusuutigineqarpoq, eqqakkanummi puussiat puiaasanik imaqarpallaartarunnaarmata oqilisimapput, Hermann Berthelsen oqaluttuarpoq.
Kommuni Kujallermi immikkoortiterisarneq suli piareersimaffigineqanngilaq.
- Nuummi suliniutaasoq pissanganarpoq, aamma maani aallartikkusuppugut sulili tassunga killissimanata, annikinnerugalartumilli misileraanissarput eqqarsaatigaarput, Leif Baadh, kommunimi teknikkeqarnermut pisortamut sinniisoq oqaluttuarpoq.
Demokraatit gruppianni siulittaasoq Anda Uldum, Radioaviisimut nassuiaavoq immikkoortiterineq qanorpiaq ingerlanneqassanersoq inissinneqanngitsoq, pingaarnersiuinermili sallersaatinneqartut ilagigaat.
Suliniutaasoq aamma Kalaallit Nunaanni Pinngortitaq Avatangiisillu pillugit peqatigiiffiup, Avatap, siulittaasuanit Mikkel Myrupimit ersaartaatigineqarpoq, taassumami pitsanngorsaatissanik pisariaqartitsisoqarnera qulanngilluinnarpaa.
- Eqqagassat piiaasarnerup ullumikkornit pitsaanerusumik ingerlanneqartalernissaa sulissutigineqartariaqarpoq. Aamma eqqagassanik immikkoortiterinissamik suliniutit aallunneqarnerusariaqartut ilagilluinnarpaat.
Mikkel Myrup naqissuserpaa Avatap eqqagassanik immikkoortiterisarneq tapersersorsinnaalluaraa, politikerilli avatangiisinik eriaginninnissaq anguniarlugu eqqagassanik immikkoortiterisarnissamik oqalunnerat tusareersimanerarpaa, tamakkulu pilersinneqarsimanngisaannarnerarlugit.
- Eqqagassat pillugit ajornartorsiutaasut qanoq iluarsiniassanerisugut inuiaqatigiinni paasiniartariaqarparput. Eqqagassanimmi piiaanermut tunngatillugu annertuupilussuarmik ajornartorsiuteqarluta nalunngilarput. Ajornartorsiutaavoq siornatigut aaqqiiviginiarneqartarsimasoq angusaqarfiuvallaarsimanngitsorli.
