Sermersuumi atuaqatigiiaat nussorneqarput

Kommuneqarfik Sermersuumi meeqqat atuarfiini allannguinikkut aningaasaqarneq piffissamillu atuineq pitsaanerulersinneqassapput.
Allattoq Elisa Isaksen
juunip 27-at 2014 07:57

Atuaqatigiinni ataatsimi atuartut pingasut atuaqatigiinnilu allani atuartut 20-t aamma illoqarfimmi ataatsimi atuartut ikittuinnaat sumiiffinni assigiinngitsuni immikkut ittumik atuartinneqarput. Kommuneqarfik Sermersuumi atuarfeqarfimmi pissutsit ukiorpaalussuarni taamaapput.

Taamaattumik Meeqqanut, Ilaqutariinnut Atuarfeqarnermullu Ingerlatsiviup isumalluutinik pigineqartunik pitsaanerusumik atuinissaq suliniutigileraa, tusagassiuutinut nalunaarumminni allapput.

- Aningaasat atugassarititaasut tunngavigalugit atuarfeqarfimmik pitsaanerpaamik ingerlatsinissarput uagut suliassaraarput, Meeqqanut, Ilaqutariinnut Atuarfeqarnermullu pisortaq Søren Valbak oqarpoq.

Ukiumi atuarfiusumi tullermi ilaatigut atuarfinni atuartut ukioqatigiit klassii 20-nit ikinnerusunik atuartullit ataatsimoortinneqalissapput. Soorlu Tasiilami Illoqqortoormiunilu taamaaliortoqassaaq.

Nuummi Atuarfik Hans Lyngemi klassit immikkut ittumik atuartitsiviusut atuarfinnut allanut nuutsinneqassapput, ilinniartitsisunik pitsaanerusumik atorluaanissaq, aammattaarli atuartut pitsaanerusumik atuartinneqarnissaat anguniarneqarluni.

Tamatuma saniatigut Nuussuup Atuarfiani 10. klassimi atuartut qulingiluat allanik ukioqateqanngimmata atuarfinnut allanut nuutsinneqassapput.

- Killeqanngitsunik aningaasanik atugassaqanngilagut. Taamaattumik aningaasaliissutigineqartut pitsaanerpaamik atorneqarnissaat pingaaruteqarpoq, Søren Valbak oqarpoq.

Atuarfinni ataasiakkaani pilersaarusiorneq naleqquttuunersoq, ukiup atuarfiusup aallartinnginnerani ingerlatsivimmit siunissami nalilersuiffigineqartassaaq.