Sermersuumi aningaasatigut aqutsineq misissorneqarnialerpoq
Immikkoortuni pingasuni ingerlatsineq misissoqqissaarneqarnissaannik kommunalbestyrelsimut innersuussuteqarniarluni Aningaasaqarnermut Ataatsimiititaq sisamanngormat maajip 15-ani aalajangerpoq. Meeqqat inuusuttullu ikorfartorneqartariaqartut, atuarfeqarneq kiisalu utoqqaat innarluutillillu annertuumik aningaasartuuteqarfiusarlutillu missingersuutinik sippuiffiusaramik misissuiffiginerisigut pissarsiffiusinnaammata Pisortaqatigiit taakku tikkuarpaat.
Ingerlatsivinnik ataasiakkaanik ingerlatsinermik misissueqqissaarnermi isornarsinnaasut isiginiarneqartarput. Ingerlatsinermik misissueqqissaarnermi sipaarsinnaassuseq, naammassisaqarsinnaassuseq pisariillisaasinnaassuserlu misissuiffigineqartarput.
Kommuneqarfik Sermersuumi immikkoortut tamakkerlugit ingerlatsinermi misissueqqissaartoqarnissaa illuatungiliuuttunit kissaatigineqarsimavoq. Aningaasaqarnermut pisortarli Aningaasaqarnermut Ataatsimiititap illumi ataatsimiinnerani ilisimatitsivoq, tamanna ukiuni arlalinni ingerlanneqassasoq 10 millionit koruunillu sinnerlugit akeqassasoq. Immikkoortuni pingasuni ingerlatsinermik misissueqqissaarnissaq 300.000 aamma 400.000 koruunit akornanni akeqassaaq.