Sermersuit aakkiartupiloormata imaq qaffakkiartorpoq

Silap pissusaa pillugu Københavnimi ataatsimeersuartitsinermut atatillugu danskit norskillu nunanut allanut ministeriaqarfiisa aaqqissugaannik immikkut sammisaqartitsisoqarmat, ilaatigut amerikami præsidentitut tullersortaasimasoq, Al Gore aamma naalakkersuisut siulittaasuat, Kuupik Kleist peqataasunut ilaapput.

Professori, Dorthe Dahl Jensen nalunaarusiaq taaguuteqartoq " The Ice sheet in a changing clime" pillugu saqqummiussivoq.

- Imaq 1,8 millimiiterimut ukiumut qaffakkiartortarpoq, ukiunilu qulini tullerni 3,4 millimiiterinut qaffakkiartulissaaq tamatumalu saniatigut nunatta aamma sikujuitsumi kujallermi sermersuit ukiumut millimiiterimik ataatsimik immap qaffakkiartorneranut ilasaataallutillu ilimagisamit aakkiartupiluulersimasut, nalunaarusiornermi paasineqarpoq.

Sermersuillu aakkiartupiloornerat siunissami immap qaffasinneranut allannguilluinnarsinnaasut, ilisimatuut taama oqariartuuteqarput.

- Kalaallit Nunaanni aamma Sikujuitsumi kujallermi sermersuit 1995-miilli aakkiartupiluulersimapput tassa iluliarsuaqarnerulersimavoq, taamaattumik siunissami ukiut 100-t ingerlaneranni immap qaffakkiartuinnarneranik tamanna kinguneqassaaq, professori, Dorthe Dahl Jensen oqarpoq nangillunilu:

- Ilisimatusarnermit paasisat kingulliit politikkertaqanngitsumik saqqummiutissallugit uagut suliassaraarput tamannalumi aamma pingaaruteqarpoq, taamaattumik neriuppunga politikerit tusaaniarnerullutik siunissami tikkuussaqarnerusumik, tamattalu nunarsuarmioqataasugut inooqataaffigisinnaasatsinnik aalajangiiumaartut, ilisimatusarnermit paasisat kingulliit pillugit saqqummiisoq, Dorthe Dahl Jensen oqarpoq.

Saqqummiunneqartullu peqataasunit tigulluarneqarput.

- Nunarsuarmiut gassinik silaannarmik kissakkiartortitsisartunik mingutsitsinerat killilersorneqartariaqarpoq, tamannarpiarlu pillugu COP15-mi sammineqarpoq, silap pissusaa pillugu ministeri, Lykke Friis oqarpoq.

Ilisimatusarnermut paasisat kingulliit pillugit nalunaarusiap aappaa taaguuteqartoq " Melting Snow an Ice Calls for Action.