Sermersuarmut takornariartitsineq aappagu misileqqinneqassaaq
Angalatitsisarfik World of Greenland - Arctic Circle aaqqissuisuuvoq, aasarmannalu aaqqissuussineq takornariarpaalunnit misilinneqarpoq iluatsilluartumik, suliffeqarfiup ulluinnarni pisortaa Kim Petersen oqaluttuarpoq.
- Matumani immikkuullarissutaasoq tassaavoq, inuit nalinginnaat atortorissaaruterpassuarnut aningaasaleeqqaanngikkaluarlutik sermersualiarsinnaallutillu unnuisinnaammata. Atortussat, toqqit allallu pisariaqartitat uagut isumagisarpavut, tamatumalu saniatigut atisat suut takornariat nassatarissaneraat oqaluttuarisarlugu.
Angalanernut Kangerlussuaq aallaaviuvoq, tassani atortut pisariaqartut peqataasunut tunniunneqartarput, matumani quaannaveequtit naqqui kamippannut ikkuttakkat ilanngullugit. Tassanngaanniit sermersuarmut biilinik ingerlasoqartarpoq tammaarsimaarfimmullu kilometerialunnik isorartutigisukkut pisuttoqartarpoq angallassisumik pikkorissumik siulersorneqartumik.
- Tammaarsimaarfik pinngortitami oqaluttualiaasorinartumi tammartajaarnakujuttumiippoq, tassani tupermi annermi kateruttarpugut ilisimasassarsiortullu toqqini marluuttarissani sinnguttarluta. Sumiiffimmi sermeq quppaqanngilaq, taamaammat kikkulluunniit peqataasinnaapput. Angalanerit ilaanni niviarsiaraq arfinilinnik ukiulik ilagaarput ajornartorsiutitaqanngitsumik, angalanermik aaqqissuussisuneersoq Christian Frimodt-Møller, Greenland.com-ip nittartagaanut oqaluttuarpoq.
