Sermersuarmi qinngussualiipput
- Sermersuup portunersaani sila allanngujaatsorujussuuvoq, silaannaq panertuuvoq unerisimasuulluni inissisimaninilu pillugu ukiup affaa kaperlattarluni. Taamaammat nunarsuarmi avataarsuanik assiliiffigissallugu erseqqarinnerpaanik assinik pissarsiffiusinnaalluni, Kristian Pedersen, Niels Bohr Institutimi Københavnimiittumi astrofysikeritut sulisoq oqarpoq, taama aviisi jp.dk nittartakkamini allaaserinnippoq.
Kristian Pedersen alla Niels Bohr Institutimi teknikeri peqatigalugu sermersuarmi amerikamiut ilisimatusarfiannut Summit Camp-imut juuli naalersoq tikeraarpoq. Tassani qinngussuaq sumerpiamiissanersoq uuttoortarpaat, maannalu napasuliamut sermip qaavanit 40 meterinik qutsinnerusumut inissippaat, siornatigut schweizimiut silap pissusaanik misissuisarfigisimasaanni.
Qinnguartaassuaq Qaasuitsup Ulloriaanut sammitinneqarpoq sekuntikkaartumik ukiap ukiullu ingerlanerani assiliiuassalluni.
Nunatta Sermersuani qinngussualiineq Avataarsuanik assiliissummut James Webb Space Telescope-mut aamma tapertaassaaq, taannaammat 2013-imi avataarsuanut aallartinneqartussaq.
Kristian Pedersen oqarpoq, qinngussuaq atorlugu takusinnaasat tupinnarluinnartuunissaat qularinagu.
